વિસાવદરના વિછાવડ ગામના સરપંચ પેશકદમી કરતા ગેરલાયક ઠરાવતા DDO

ખાસ-ખબર ન્યૂઝ જૂનાગઢ, તા.10
વિસાવદર તાલુકાના વિછાવડ ગામના સરપંચને ડીડીઓ દ્વારા સસ્પેન્ડ કરાતા તાલુકા ભરમાં ચકચાર મચી ગયેલ છે. આ અંગેની વિગત એવા પ્રકારની છે કે, વિછાવડ ગામના સરપંચ સંજયભાઈ વજુભાઇ નલિયાધરાએ તેમની ચૂંટણીના ફોર્મમાં એકરારનામામાં જે મિલકત દર્શાવેલ હતી તે મિલકતમાં તેઓ રહેતા ન હતા અને તે મિલકતનો કબજો બીજા વ્યક્તિ પાસે હતો અને સરપંચ ગ્રામ પંચાયતની જમીનમાં જ પેશકદમી કરી મકાન બનાવી રહેતા હોય આ બાબતની હકીકત સંબંધે રજુઆત કરતા તેઓને સાંભળવા જરૂરી તકો આપવા છતાં તેઓ તરફથી કોઈ રજુઆત ન કરાતા રેકર્ડ ઉપરના પુરાવા ધ્યાને લઇ જિલ્લા વિકાસ અધિકારી નીતિન સાંગવાન દ્વારા આ સરપંચને તેમના સરપંચ તરીકેના હોદા ઉપરથી દૂર કરી ઉપસરપંચને ચાર્જ આપવા હુકમ કરતા ફફડાટ મચી ગયેલ છે. અને વિસાવદર તાલુકાના અન્ય સરપંચો દ્વારા પણ પંચાયતની જમીનમાં પેશકદમી કરેલ હોય તથા અન્ય લોકોની પેશકદમી હોય તે જાણવા છતાં દૂર કરાવતા ન હોય તેવા સરપંચ સામે પણ ટુક સમયમાં કાર્યવાહી થનાર હોવાની વાતો વહેતી થતા તાલુકામાં ફફડાટ મચી ગયેલ છે.