પ્રદૂષણ- ધુમ્મસને કારણે 22 ટ્રેનો મોડી, DU-JNUની તમામ કોલેજોમાં ઑનલાઇન અભ્યાસ
સુપ્રીમ કોર્ટે કર્મચારીઓ માટે માસ્ક પહેરવાનું ફરજિયાત કર્યું
ખાસ-ખબર ન્યૂઝ નવી દિલ્હી
- Advertisement -
દિલ્હીમાં પ્રદૂષણનું સ્તર ખતરનાક સ્તરે છે. મંગળવારે સવારે દિલ્હીના ઘણા વિસ્તારોમાં AQI 500ને પાર નોંધાયો હતો. દિલ્હીનો સરેરાશ AQI 494 નોંધાયો હતો, જે આ સિઝનમાં સૌથી વધુ છે. દિલ્હી-એનસીઆરમાં ધોરણ 10 સુધીની સ્કૂલો પહેલાથી જ ઓનલાઈન થઈ ગઈ હતી. સોમવારે સુપ્રીમ કોર્ટની ઝાટકણી બાદ 11મા-12માના વર્ગ ઓનલાઈન ચલાવવાના આદેશ આપવામાં આવ્યા છે. તેમજ, ડીયુ અને જેએનયુની કોલેજોમાં વર્ગો 4 દિવસ માટે ઓનલાઈન જ ચાલશે.
વધતા પ્રદૂષણને ધ્યાનમાં રાખીને, કમિશન ફોર એર ક્વોલિટી મેનેજમેન્ટ (CAQM) એ 18 નવેમ્બરથી દિલ્હી-ગઈછમાં સંશોધિત ગ્રેડેડ રિસ્પોન્સ એક્શન પ્લાન (GRAP)ના ચોથા તબક્કાનો અમલ કર્યો છે. ઉપરાંત, બાળકો, વૃદ્ધો, શ્ર્વસન અને હૃદયના દર્દીઓ અને જેઓ ક્રોનિક રોગોથી પીડિત છે તેમને ઘરમાં જ રહેવાની સલાહ આપવામાં આવી છે.
સુપ્રીમ કોર્ટે તેના સ્ટાફ માટે માસ્ક પહેરવાનું પણ ફરજિયાત બનાવ્યું છે. સોમવારે, દિલ્હી-એનસીઆર ક્ષેત્રની સરકારોને પ્રદૂષણની ગંભીરતાને ધ્યાનમાં રાખીને શાળાઓ બંધ કરવા સૂચના આપવામાં આવી હતી. AQI સ્તર ઘટાડવા માટે, ગ્રેડેડ રિસ્પોન્સ એક્શન પ્લાન (GRAP)સ્ટેજ 3 અને સ્ટેજ 4 ના તમામ જરૂરી નિયંત્રણો લાગુ કરવા જોઈએ. સાથે જ સૂચના આપવામાં આવી છે – કોર્ટની પરવાનગી વિના GRAP સ્ટેજ 4 પ્રતિબંધો દૂર કરવામાં આવશે નહીં. ભલે AQI 300થી નીચે આવે. દિલ્હી ટ્રાન્સપોર્ટ ડિપાર્ટમેન્ટે 1 ઓક્ટોબરથી 15 નવેમ્બરની વચ્ચે વધુ 2,234 વાહનો જપ્ત કર્યા હતા, જે ખૂબ જ જૂના હતા. તેમાં 10 વર્ષથી જૂના 260 ડીઝલ ફોર-વ્હીલર, 1,156 પેટ્રોલ ટુ-વ્હીલર અને 818 પેટ્રોલ થ્રી- અને 15 વર્ષથી જૂના ફોર-વ્હીલરનો સમાવેશ થાય છે. આ કાર્યવાહી ડિસેમ્બર સુધી ચાલુ રહેશે. જપ્ત કરાયેલા વાહનોના સ્ક્રેપિંગ કે વેચાણ માટે ઓનલાઈન પોર્ટલ શરૂ કર્યું છે.
