જનસેવા કેન્દ્રો તથા ઈ-ધરાની કામગીરી કરતી આઉટસોર્સિંગ એજન્સીએ ઓપરેટરોનાં પગાર અને પી.એફ. હડપ કર્યા.
આઉટસોર્સિંગ એજન્સીનાં કૌભાંડો અંગે કલેક્ટર-મામલતદારમાં અનેક ફરિયાદો છતાં પરિણામ શૂન્ય
આઉટસોર્સિંગ એજન્સીની આડોડાઈથી કોમ્પ્યૂટર ઓપરેટરોની હાલત દયનીય
રાજકોટ મહાનગરપાલિકામાં મેન પાવર સપ્લાયરનો કોન્ટ્રાક્ટ ધરાવતી ‘જી. ડી. અજમેરા મેન પાવર સપ્લાય’ એજન્સી દ્વારા કામદારોના પી.એફ. જી.એસ.ટી. સી.જી.એસ.ટી., ઈ એસઆઈસીના કરોડો રૂપિયાની ઉચાપત કરી આચરેલા કૌભાંડોનો એક પછી એક પર્દાફાશ થઈ રહ્યો છે ત્યારે રાજકોટ જિલ્લામાં આવેલા જનસેવા કેન્દ્રો તથા ઈ-ધરાની કામગીરીમાં આઉટસોર્સિંગ એજન્સીના કાળા કારનામાઓનો સામે આવ્યા છે. અજમેરા એજન્સીની જેમ જ શ્રી દેવીદાસ વિવિધ વિકાસલક્ષી ટ્રસ્ટ મડાણા (ગઢ) એજન્સી અને મીડિયેટ રીક્રુટ મેનેજમેન્ટ પ્રાઈવેટ લિમિટેડ રાજકોટે પણ ઓપરેટરોના પી.એફ. સહિતની રકમમાં કરોડો રૂપિયાનું કૌભાંડ આચર્યું છે.
કોર્પોરેશનમાં અજમેરા એજન્સી અને જિલ્લા તંત્રમાં મીડિયેટ રિક્રુટમેન્ટ તથા દેવીદાસ ટ્રસ્ટ દ્વારા મોટી ઉચાપત
છેલ્લાં ત્રણ દિવસ દરમિયાન ‘ખાસ-ખબર’ દ્વારા કોર્પોરેશનની એજન્સી ‘જી. ડી. અજમેરા મેનપાવર સપ્લાય’ના કૌભાંડો ઊઘાડાં કરવામાં આવી રહ્યાં છે. જાણવા મળતી વિગતો મુજબ ગૌરવ અજમેરાનાં આ કૌભાંડોની નોંધ અતિ ઉચ્ચ સ્તરે લેવાઈ છે અને તેમાં કેટલાંક મોટાં માથાઓની સંડોવણી ખૂલવાની પણ પૂરેપૂરી સંભાવના છે. આવી જ રીતે કલેકટર તંત્ર હેઠળ આવતી કામગીરીનું આઉટ સોર્સીંગનું કામ મીડિયેટ રિક્રુટ મેનેજમેન્ટ પ્રા. લિ. દ્વારા અને શ્રી દેવીદાસ વિવિધ વિકાસલક્ષી ટ્રસ્ટ દ્વારા થાય છે. આ બેઉ એજન્સીઓ પણ શોષણનાં તમામ સીમાડાઓ વટાવી ચૂકી છે. ભોગ બનનાર કર્મચારીઓએ કલેકટરને રજૂઆત પણ કરી છે. ન્યાયપ્રિય, કડક કલેકટર અરૂણ મહેશ બાબુ આ અંગે યોગ્ય પગલાં લેશે તેવી પીડિતોને અપેક્ષા છે.
- Advertisement -
શ્રી દેવીદાસ અને મીડિયેટ રીક્રુટ મેનેજમેન્ટ દ્વારા ઓપરેટરોને લઘુત્તમ વેતન ચૂકવવામાં આવ્યું નથી, પગાર સ્લીપ અપાતી નથી !
દેવીદાસ વિવિધ વિકાસલક્ષી ટ્રસ્ટ એજન્સી દ્વારા ભરતી કરાયેલાં ઓપરેટરોનાં પગારમાંથી દર મહિને 730 બોનસ પેટે કપાત કરાય છે, કર્મચારીઓનાં પી.એફ. એકાઉન્ટ ખોલાયા નથી
મીડિયેટ રીક્રુટ એજન્સીને મહિનાઓ અગાઉ બ્લેકલિસ્ટ કરી દેવાઈ છે અને કર્મચારીઓનો બે મહિનાનો પગાર બાકી
શ્રી દેવીદાસ વિવિધ વિકાસલક્ષી ટ્રસ્ટ મડાણા (ગઢ) એજન્સી દ્વારા રાજકોટ મામલતદાર કચેરીમાં આઉટસોર્સિંગથી ફાળવેલા ઓપરેટરોનો નિયમીત પગાર થતો નથી. ઈ-ધરા ઓપરેટરનો ઓક્ટોબર મહિનાનો પગાર પણ હજુ સુધી બાકી છે. ગાંધીનગરથી થયેલ હુકમ મુજબ દિવાળીના તહેવારનો પગાર વહેલા ચૂકવવાનો હોય છતાં હજુ સુધી પગાર ચૂકવાયેલો નથી. આ ઉપરાંત ઓપરેટરોના પગારમાંથી દર મહિને પી.એફ.ની રકમ કપાત કરવામાં આવે છે પરંતુ તેઓના પી.એફ. એકાઉન્ટ પણ ખોલવામાં આવ્યા નથી તથા દર મહિને રૂ. 730 બોનસ પેટે કપાત કરે છે તથા ઓપરેટરોને પગાર સ્લીપ પણ આપવામાં આવતી નથી અને ખાલી થયેલ કાર્ટિઝ રિફિલ માટે પરત મોકલવા ઓપરેટર ખર્ચ ભોગવો પડે છે.
આ અગાઉની એજન્સી મીડિયેટ રીક્રુટ મેનેજમેન્ટ પ્રાઈવેટ લિમિટેડ રાજકોટે દ્વારા તા. 01/07/2020થી તા. 31/05/2021 સુધી કામગીરી કરેલી છે. ત્યારબાદ આ એજન્સીને બ્લેકલીસ્ટ કરવામાં આવેલી છે છતા પણ હજુ સુધી આ એજન્સીના બે મહિનાના પગાર બાકી છે તથા આ એજન્સીએ તા. 01/07/2020થી તા. 31/05/2021 સુધીના પી.એફ. કાપેલુ છે પણ ઓપરેટરોને હજુ સુધી પી.એફ પણ આપેલુ નથી અને પી.એફ. એકાઉન્ટ પણ ખોલાવેલા નથી. એજન્સીને વારંવાર રજૂઆત કરવા છતાં પણ કોઈ નિકાલ આવ્યો નથી ત્યારબાદ કલેકટર કચેરીમાં પણ રજૂઆત કરવામાં આવી હતી પણ હજુ સુધી આ મામલે કોઈ નિકાલ આવેલો નથી.
- Advertisement -
મીડિયેટ રીક્રુટ મેનેજમેન્ટ પ્રાઈવેટ લિમિટેડે રાજકોટ બાદ તા.01/06/2021થી શ્રી દેવીદાસ વિવિધ વિકાસલક્ષી ટ્રસ્ટ મડાણા (ગઢ)ને કામગીરી સોપવામા આવેલી પણ આ એજન્સી દ્વારા પણ નિયમીત પગાર થતો નથી અને ઓપરેટરોના પગારમાંથી દર મહિને પી.એફ.ની રકમ કપાત કરવામાં આવે છે પરંતુ તેઓના હજુ સુધી પી.એફ. એકાઉન્ટ પણ ખોલાવેલ નથી તથા દર મહિને રૂ. 730 બોનસ પેટે કપાત કરે છે પરંતુ ઓપરેટરોને ચૂકવાતા નથી અને કરાર મુજબ લઘુતમ વેતન પણ ચૂકવવામાં આવતું નથી તથા ઓપરેટરોને પગાર સ્લીપ પણ આપવામાં આવતી નથી એટલું જ નહીં પરંતુ સ્ટેશનરીની સામગ્રી લેવા પણ ઓપરેટરોએ પોતાના ખર્ચે આવવુ જવું પડે છે.
શ્રી દેવીદાસ વિવિધ વિકાસલક્ષી ટ્રસ્ટ મડાણા (ગઢ) એજન્સી અને મીડિયેટ રીક્રુટ મેનેજમેન્ટ પ્રાઈવેટ લિમિટેડની નાલાયકી
ખાસ-ખબર સંવાદદાતા
રાજકોટ જિલ્લામાં આવેલા જનસેવા કેન્દ્રો તથા ઈ-ધરાની કામગીરીમાં આઉટસોર્સિંગ એજન્સી શ્રી દેવીદાસ વિવિધ વિકાસલક્ષી ટ્રસ્ટ મડાણા (ગઢ) એજન્સી અને મીડિયેટ રીક્રુટ મેનેજમેન્ટ પ્રાઈવેટ લિમિટેડે નાલાયકીની તમામ હદ વટાવી ઓપરેટરોના પગાર ચૂકવ્યા નથી ઉપરાંત તેમના પી.એફ. સહિતની રકમ પણ હડપ કરી લીધી છે. શ્રી દેવીદાસ વિવિધ વિકાસલક્ષી ટ્રસ્ટ મડાણા (ગઢ) એજન્સી અને મીડિયેટ રીક્રુટ મેનેજમેન્ટ પ્રાઈવેટ લિમિટેડ એજન્સી પાસે જ્યારે ઓપરેટરો પોતાનો પગાર માંગવા જાય છે ત્યારે તેમને અપમાનિત કરી કાઢી મૂકવા છે.
આ અંગે રાજકોટ જિલ્લા કલેક્ટર અને મામલતદાર કચેરીમાં વારંવાર ફરિયાદ પણ કરવામાં આવી છે તેમ છતાં જાડી ચામડીના અધિકારીઓએ આ અંગે ચોક્કસ ફાયદાની આશાએ બેમાંથી એક પણ એજન્સી પર કોઈ જ પગલાં ભર્યા નથી.
