-ભાજપે ગુજરાતના ચૂંટણી ખર્ચનો હિસાબ હજુ પંચને આપ્યો નથી
મોટા રાજકીય પક્ષો ચૂંટણીમાં છૂટા હાથે નાણાં વેરતા હોય છે ત્યારે કોંગ્રેસે ગુજરાત અને હિમાચલ પ્રદેશની ગયા વર્ષના વિધાનસભા ચૂંટણીમાં રૂા.130 કરોડનો ખર્ચ કર્યો હોવાનું જણાવ્યું છે. પક્ષે ચૂંટણી પંચને આપેલા ખર્ચ અંગેના અહેવાલમાં વિગતવાર માહિતી આપી છે. જયારે ભાજપે હિમાચલ પ્રદેશની ચૂંટણીમાં રૂા.49 કરોડનો ખર્ચ કર્યો છે.
- Advertisement -
ચૂંટણીપંચે હજુ ભાજપનો ગુજરાત વિધાનસભા ચૂંટણીના ખર્ચનો અહેવાલ જાહેર કર્યો નથી. ઉલ્લેખનીય છે કે, ભાજપે ગુજરાતની ચૂંટણીમાં મોટી જીત મેળવી હતી. જયારે કોંગ્રેસે હિમાચલ પ્રદેશમાં ભાજપ પાસેથી સત્તા આંચકી લીધી હતી. અહેવાલમાં જણાવ્યા અનુસાર બંને પક્ષે મોટાભાગના નાણાં તેમના ઉમેદવારોના પ્રચાર અને એડ. તેમજ સ્ટાર પ્રચારકોના પ્રવાસ પાછળ ખર્ચ્યા હતા. કોંગ્રેસે હિમાચલ પ્રદેશમાં રૂા.27.02 કરોડ અને ગુજરાતમાં 103.62 કરોડનો ખર્ચ કર્યો હતો.
અહેવાલમાં જણાવ્યા અનુસાર કોંગ્રેસે હિમાચલ પ્રદેશમાં ઉમેદવારો પાછળ રૂા.14.80 કરોડ, એડ. અને પ્રચાર માટે રૂા.2.74 કરોડ તેમજ સ્ટાર પ્રચારકોના પ્રવાસ પાછળ રૂા.5.28 કરોડ ખર્ચ્યા હતા. જેમાં અગ્રણી નેતાઓ માટે ચાર્ટર વિમાનનો ખર્ચ પણ સામેલ છે. ગુજરાતમાં કોંગ્રેસે ઉમેદવારો પાછળ રૂા.45.34 કરોડનો ખર્ચ કર્યો હતો. જયારે પોસ્ટર્સ, બેનર્સ સહિત પબ્લીસીટી માટે રૂા.18.08 કરોડ ખર્ચાયા હતા. પક્ષે એડ. પાછળ રૂા.11.27 કરોડ અને સ્ટાર પ્રચારકોના પ્રવાસ માટે રૂા.9.88 કરોડ વાપર્યા હતા.
ભાજપે હિમાચલ પ્રદેશના ખર્ચનો હિસાબ આપ્યો છે. ચૂંટણી પંચના અહેવાલમાં જણાવ્યા અનુસાર પક્ષે રાજયની ચૂંટણીમાં રૂા.49.69 કરોડ ખર્ચ્યા હતા. ભાજપે સ્ટાર પ્રચારકોના પ્રવાસ પાછળ રૂા.15.19 કરોડ ખર્ચ્યા હતા. જયારે પબ્લીસીટી પાછળ રૂા.8.5 કરોડ અને ઉમેદવારો માટે રૂા.18.57 કરોડનો ખર્ચ કરાયો હતો. ઉલ્લેખનીય છે કે, રાજકીય પક્ષો ચૂંટણીમાં ઉમેદવારો, સ્ટાર પ્રચારકો, એડ. પબ્લીસીટી પાછળ મોટો ખર્ચ કરતા હોય છે. તેમણે ખર્ચનો વિગતવાર હિસાબ ચૂંટણી પંચને આપવો પડે છે.
