કાળાબજાર કરનારાઓને જેલભેગા કરાશે અને લાયસન્સ રદ થશે: ડોમેસ્ટિક સિલિન્ડરના હેતુફેર પર પાસા સુધીની કાર્યવાહીની ચેતવણી: જિલ્લામાં ઘરેલુ ગેસનો પૂરતો જથ્થો ઉપલબ્ધ
સંગ્રહખોરી અટકાવવા બુકિંગ વચ્ચે 25થી 45 દિવસનો ગાળો નક્કી કરાયો; એજન્સીઓને પોલીસ પ્રોટેક્શન અપાશે
- Advertisement -
ખાસ-ખબર ન્યૂઝ મોરબી
મોરબી જિલ્લામાં ગેસ વિતરણ વ્યવસ્થાને વધુ સુદ્રઢ બનાવવા અને કાળાબજાર અટકાવવા માટે કલેક્ટર કે. બી. ઝવેરીના અધ્યક્ષસ્થાને તેમજ જિલ્લા પોલીસ અધિક્ષક મુકેશ પટેલની ઉપસ્થિતિમાં મહત્વની બેઠક યોજાઈ હતી. મધ્ય પૂર્વના દેશોમાં ચાલી રહેલા ભૌગોલિક તણાવને પગલે ઉભી થયેલી સ્થિતિમાં લોકો બિનજરૂરી સંગ્રહખોરી ન કરે અને વિતરણ વ્યવસ્થા પારદર્શક રહે તે માટે તંત્ર દ્વારા કડક સૂચનાઓ આપવામાં આવી છે.
કલેક્ટર કે. બી. ઝવેરીએ ગેસ એજન્સીના વિતરકોને સ્પષ્ટ તાકીદ કરી છે કે જો ઘરેલુ ગેસ સિલિન્ડરનો કમર્શિયલ હેતુ માટે ઉપયોગ કે કાળાબજાર કરતા કોઈ ઝડપાશે, તો તેની સામે કડક કાર્યવાહી કરવામાં આવશે. પોલીસ અધિક્ષક મુકેશ પટેલે ઉમેર્યું હતું કે આવા તત્વો સામે આવશ્યક ચીજવસ્તુ ધારા હેઠળ ગુનો નોંધી ધરપકડ કરવામાં આવશે અને જરૂર જણાયે ’પાસા’ (ઙઅજઅ) જેવી સખત કાર્યવાહી પણ કરાશે. આવી એજન્સીઓને બ્લેકલિસ્ટ કરી તેમના લાયસન્સ કાયમી ધોરણે રદ કરવાની પણ ચેતવણી આપવામાં આવી છે. જોકે, ગેસના સુરક્ષિત પરિવહન માટે એજન્સીઓને પોલીસ પ્રોટેક્શન પૂરું પાડવાની ખાતરી પણ અપાઈ છે.
જિલ્લામાં એલ.પી.જી. અને પીએનજી (ઙગૠ) ગેસનો પૂરતો જથ્થો ઉપલબ્ધ હોવાનું જણાવતા કલેક્ટરે કહ્યું કે, કેન્દ્ર સરકારના સૂચન મુજબ સંગ્રહખોરી અટકાવવા માટે હવે બે સિલિન્ડરના બુકિંગ વચ્ચે શહેરી વિસ્તારમાં 25 દિવસ અને ગ્રામીણ વિસ્તારમાં 45 દિવસનો સમયગાળો રાખવો ફરજિયાત છે. હાલમાં કોમર્શિયલ સિલિન્ડરનું વેચાણ નિયંત્રિત કરાયું છે, પરંતુ હોસ્પિટલો અને શૈક્ષણિક સંસ્થાઓને તેમની જરૂરિયાત મુજબ પુરવઠો મળતો રહેશે.
જિલ્લા પુરવઠા અધિકારી જૈમિન કાકડિયાએ તમામ વિતરકોને સ્ટોકની આવક-જાવકનું મેન્યુઅલ અને ઓનલાઈન રજિસ્ટર નિભાવવા આદેશ આપ્યો છે. સાથોસાથ, એજન્સી પર આવતા ગ્રાહકો માટે પીવાનું પાણી, છાંયડો અને બેઠક વ્યવસ્થા રાખવા તેમજ ગ્રાહકો સાથે વિનયપૂર્વક વર્તવા વિતરકોને સૂચના અપાઈ છે. આ બેઠકમાં અધિક નિવાસી કલેક્ટર એસ. જે. ખાચર સહિતના અધિકારીઓ અને એજન્સી ધારકો મોટી સંખ્યામાં ઉપસ્થિત રહ્યા હતા.
