ચોટીલા પ્રાંત દ્વારા ખનિજ વહન અંગે હપ્તા વસૂલીના ઓડિયો વાયરલ કર્યા
ખાસ-ખબર ન્યૂઝ સુરેન્દ્રનગર, તા.24
સુરેન્દ્રનગર જિલ્લામાં ચાલતા ખનીજના બેરોકટોક ખનન સામે એકમાત્ર ચોટીલા પ્રાંત અધિકારી એચ.ટી.મકવાણા દ્વારા રીતસરનો મોરચો માંડ્યો હોય તેવું દૃશ્ય નજરે પડે છે જેમાં એચ.ટી.મકવાણા દ્વારા જ્યારથી ચોટીલા પ્રાંત અધિકારીનો ચાર્જ સંભાળ્યો ત્યારથી ખનિજ માફિયાઓના મનમાં ડર બેસાડી દીધો છે અને દરરોજ ખનિજ ચોરી થતા વહન કરતા ઇસમોને ઝડપી લેવામાં આવે છે આ સાથે અધિકારીઓની રેકી કરતા કેટલાક વોટ્સએપ ગ્રુપ અને ખનિજ વાહનમાં પાયલોટિંગ આપતા મુખ્ય ખનિજ માફિયાઓને પણ કાયદાનું ભાન કરાવ્યું છે તેવામાં હવે ચોટીલા પ્રાંત અધિકારી દ્વારા ખનિજ ચોરી કરતા ઈસમો અને પોલીસ વચ્ચેના હપ્તાખોરી અંગેની સાંઠગાંઠ પણ ખુલ્લી પડી છે જેમાં શનિવારે ચોટીલા પ્રાંત અધિકારી દ્વારા હાઇવે પર ખનિજ વહન કરતા વાહનો ઝડપી લઇ ખનિજ વાહનોને પાયલોટિંગ આપતા બે શખ્સોને ખાનગી કાર સાથે ઝડપી લીધા હતા આ શખ્સોને જે મોબાઈલ સાથે ઝડપી લીધા હતા તેમાં એક રણજીતસિંહ નામના શખ્સનો ફોન પણ આવ્યો હતો અને આ રણજીતસિંહ પોતે એલ.સી.બીમાં ફરજ બજાવતા અને હાલ ચોટીલા ખાતે હોવાનું જણાવતા હતા જ્યારે પ્રાંત અધિકારી દ્વારા કથિત પોલીસ કર્મચારી રણજીતસિંહને બકલ નંબર માંગતા જ પોતે ફોન કાપી નાખ્યો હતો જેથી સ્પષ્ટ રીતે ચોટીલા પોલીસ મથકના ફરજ બજાવતા પોલીસ રણજીતસિંહ ખનિજ માફિયા સાથે સંકલનમાં હોય તેવું સામે આવ્યું હતું આ સાથે ખનિજ માફિયાઓના મોબાઈલમાંથી લીમડી ડી.વય.એસ.પી અને સુરેન્દ્રનગર ડી.વય.એસ.પી સહિત અન્ય પોલીસ કર્મચારી ખનિજ ભરેલા વાહનોના હપ્તા વસૂલી કરતા હોવાના ઓડિયો રેકોર્ડિંગ પણ સામે આવ્યા હતા. જેથી સુરેન્દ્રનગર જિલ્લા પોલીસ ખનિજ માફીયાઓ સાથે સાંઠગાંઠ ધરાવતા હોવાના પુરાવા સહિત હપ્તાખોરી સામે આવી હતી. આ તરફ પ્રાંત અધિકારી એચ.ટી.મકવાણા દ્વારા ખનિજ માફિયાઓના મોબાઈલ ફોનમાંથી નીકળેલા હત્યાખોરીના ઓડિયો રેકોર્ડિંગ અને વાતચીત અંગેના પુરાવા સાથે સુરેન્દ્રનગર જિલ્લા એલ.સી.બી કચેરી અને જિલ્લા પોલીસ વડાને રજૂ કર્યા હતા જેના સામે હવે આ તમામ હપ્તાખોરી કરતા પોલીસ કર્મચારીઓ પર કેવા પ્રકારના પગલા ભરાય છે તેની સામે સૌની નજર મંડાયેલી છે.
- Advertisement -
“ખાસ-ખબર” અખબાર દ્વારા છેલ્લા પાંચેક મહિનાથી સુરેન્દ્રનગર જિલ્લામાં ચાલતા ગેરકાયદેસર ખનન પ્રકિયા અને તેના વહીવટદારોને ખુલ્લા પાડવાના અનેક અહેવાલો પ્રસિધ્ધ કરી ચૂક્યું છે જેમાં 18 માર્ચના ખનિજ માફીયાઓ તંત્રના “પ્રતાપે” “રવિ” આંબી ગયાનો અહેવાલ પ્રસિધ્ધ કરી તંત્રને ખનિજ માફીયાઓ સાથે વહિવટીયા ખેલનો સંકેત આપ્યો હતો.
“ખાસ ખબર” અહેવાલ બાદ ચોટીલા પ્રાંત દ્વારા ઊંડાણપૂર્વક તપાસ કરતા ઘટસ્ફોટ
” ખાસ ખબર” ફરી એક વખત અગ્રેસર સાબિત થયું છે જેમાં 18 માર્ચના રોજ જાહેર કરેલા અહેવાલને ધ્યાને લઈ ચોટીલા પ્રાંત અધિકારી દ્વારા ખનિજ માફિયાઓના મોબાઈલમાંથી વહીવટદારો સાથે ખનિજ માફિયાઓની સાંઠગાંઠનો ઘટસ્ફોટ કર્યો છે.
- Advertisement -
ખનિજ મફિયાઓ સાથે વહીવટીયા ખેલના આક્ષેપથી બચવા હાથ અધ્ધર કરાયા
ચોટીલા પ્રાંત અધિકારી દ્વારા ખનિજ માફિયાઓના મોબાઈલમાંથી કાઢવામાં આવેલ લીમડી ડી.વાય.એસ.પી, સુરેન્દ્રનગર ડી.વાય.એસ.પી અને એલ.સી.બી શાખાના કથિત ઓડિયો રેકોર્ડિંગથી બચવા માટે હાથ અધ્ધર કરી દીધા છે પરંતુ ખરેખર આ વહીવટમાં પોતે સામેલ ન હોય તો પોલીસની સાખ બદનામ કરતા આવા તત્વો વિરુધ્ધ જે તે પોલીસ અધિકારીએ જ ગુન્હો નોંધાવી જરૂરી છે.
