મુખ્યમંત્રી ભૂપેન્દ્રભાઈ પટેલએ ચાપરડાના બ્રહ્માનંદ વિદ્યાધામના યજ્ઞકુંડમાં શ્રીફળની આહુતિ આપી

મહંત શ્રીમુક્તાનંદ બાપુની સેવાકીય પ્રવૃત્તિને બિરદાવી

ખાસ-ખબર ન્યૂઝ જૂનાગઢ, તા.29
મુખ્યમંત્રી ભૂપેન્દ્રભાઈ પટેલે ગત રોજ જૂનાગઢ જિલ્લાના ચાપરડા ખાતે બ્રહ્માનંદ વિદ્યાધામની મુલાકાત લીધી હતી. મુખ્યમંત્રીએ મહંત શ્રી મુક્તાનંદ બાપુની સેવાકીય પ્રવૃત્તિઓને બિરદાવી હતી. મુખ્યમંત્રીએ વિદ્યાર્થીઓને પણ પ્રોત્સાહિત કર્યા હતા.મુખ્યમંત્રી બ્રહ્માનંદ આશ્રમ દ્વારા ચાલતી શૈક્ષણિક અને સેવાકાર્યોની વિસ્તૃત જાણકારીથી અવગત થયા હતા. સાથે જ બ્રહ્માનંદ વિદ્યાધામના શિસ્તબદ્ધ વાતાવરણ સરાહના કરી હતી. આ મુલાકાત દરમિયાન મુખ્યમંત્રી અને રાજ્યના કૃષિ મંત્રી રાઘવજીભાઈ પટેલ અને શ્રી મુક્તાનંદ બાપુએ યજ્ઞકુંડમાં શ્રીફળની આહુતિ પણ આપી હતી.શ્રી બ્રહ્માનંદ આશ્રમના મહંત શ્રીમુક્તાનંદજી બાપુએ મુખ્યમંત્રીને શાલ ઓઢાડી અને પુષ્પગૂચ્છ અર્પણ કરીને પરંપરાગત રીતે સ્વાગત કર્યું હતું. આ પ્રસંગે સંસ્થાના વિદ્યાર્થીઓ દ્વારા વંદે માતરમ તથા ભારત માતા કી જયના ઉમંગભેર ઉચ્ચારણ સાથે મુખ્યમંત્રીનું ઉષ્માભર્યું સ્વાગત કર્યું હતું. ઉપરાંત વિદ્યાર્થીઓ દ્વારા સ્વહસ્તે તૈયાર કરાયેલ સ્કેચ મુખ્યમંત્રીશ્રીને ભેટરૂપી અર્પણ કરી હતી. ચાપરડા બ્રહ્માનંદ આશ્રમ ખાતે સાંસદ રાજેશભાઈ ચુડાસમા, જિલ્લા કલેકટર, જિલ્લા વિકાસ અધિકારી, ઇન્ચાર્જ જિલ્લા પોલીસ વડા, જિલ્લા ભાજપ પ્રમુખ, જેડીસીસી બેંકના ચેરમેન કિરીટભાઈ પટેલ સહિતના મહાનુભાવો ઉપસ્થિત રહ્યા હતા.