પેઢી પાસેથી માલ લઇ રૂા. 26,58,996નો ચેક આપેલો જે પરત ફર્યોં
સિદ્ધનાથ કોટેક્ષ પ્રા. લિ. અને તેના ડિરેકટરોને અદાલતમાં હાજર થવા ફરમાન
- Advertisement -
ખાસ-ખબર ન્યૂઝ ચોટીલા, તા.21
ચોટીલા-થાન રોડ ઉપર આવેલા સિદ્ધનાથ કોટેક્ષ એન્ડ સ્પીનીંગ મીલના ડાયરેકટરોએ સૌરાષ્ટ્રના અનેક ખેડૂતો તથા વેપારીઓ પાસેથી માલ ખરીદી તે અન્વયેનું પેમેન્ટ ન કરતાં અને કરોડોનું ફૂલેકું ફેરવતાં તે અન્વયે સિદ્ધનાથ કોટેક્ષના ડીરેકટરો વિરૂદ્ધ ગુનો પણ દાખલ થયેલો હોય તદઉપરાંત કાયદેસરના માલના લેણા પેટે જુદા જુદા લોકોને ઈસ્યુ કરી આપેલા ચેકો પૈકી શાહ રમેશચંદ્ર ભગવાનલાલ પ્રોપાઈટર પેઢી જોગ માલના લેણા પેટે ઈસ્યુ કરી આપેલી રકમ રૂા. 26,58,996નો ચેક રિટર્ન થતાં તે અન્વયે રાજકોટની અદાલતમાં સિદ્ધનાથ કોટેક્ષ પ્રા. લિ. તથા તેના ડાયરેકટરો વિરૂદ્ધ ફરિયાદ દાખલ કરવામાં આવતા રાજકોટના એડિ. ચીફ જ્યુડિ. મેજિ.એ સિદ્ધનાથ કોટેક્ષ પ્રા. લિ. તથા તેના ડાયરેકટરો વિરૂદ્ધ પ્રોસેસ ઈસ્યુ કરતો હુકમ ફરમાવેલો છે.
કેસની હકીકત જોઈએ તો રાજકોટમાં વ્હોકાર્ટ હોસ્પિટલ પાસે રહેતાં રમેશચંદ્ર જીવાણી કે જેઓ જસદણ ખાતે શાહ રમેશચંદ્ર ભગવાનલાલ નામની પ્રોપાઈટર પેઢી ધરાવતા હોય જે ફરિયાદી પેઢી પાસેથી આરોપી કંપનીએ અગાઉ લાખો રૂપિયાનો માલ ખરીદ કરી બાદમાં તેનું પેમેન્ટ કરી દઈ તે રીતે વિશ્ર્વાસ સંપાદિત કરી છેલ્લે રકમ રૂા. 26,79,649નો માલ ખરીદ કરી તેમાંથી ક્વોલિટી એલાઉન્સ, ડેબીટ નોટની રકમ રૂા. 18,101 તથા બે બીલોના ટીડીએસની રકમ રૂા. 5121 તથા રકમ રૂા. 2552 બાદ કરી રકમ રૂા. 26,58,996નું ફરિયાદીનું માલ પેટેનું કાયદેસરનું લેણુ અદા કરવા આરોપી કંપની વતી તેના ડાયરેકટરોએ ફરિયાદી પેઢી જોગ ચેક ઈસ્યુ કરી આપી સહી કરી આપી ચેક પાસ થઈ જવા અને પરત નહીં ફરે અને લેણુ વસુલાઈ જશે તેવા આપેલા વચન શબ્દોના ભરોસે સ્વીકારેલો ચેક ફરિયાદી પેઢીએ રાજકોટની તેઓની બેંકમાં ચેક રજૂ રાખતાં ચેક પાસ થયેલો નહીં અને ચેક રિટર્ન તથા તે અન્વયે આરોપી કંપની અને તેના ડાયરેકટરોને લેણાની માગણા નોટીસ આપવામાં આવેલી જે નોટીસો બજી જવા છતાં ફરિયાદી પેઢીનું કાયદેસરનું લેણુ અદા ન કરી પ્રથમથી જ ફરિયાદી પેઢીનું લેણુ ડૂબાડવાનો બદઆશય ધારણ કરી આરોપીઓએ ધી નેગોશીયેબલ ઈન્સ્ટ્રુમેન્ટ એક્ટ અન્વયે ગંભીર પ્રકારનો ગુનો કરેલો હોવાથી આરોપીઓ વિરૂદ્ધ ચેકો રિટર્ન સંબંધે અદાલતમાં ફરિયાદ દાખલ કરી રજૂઆત કરવામાં આવેલી કે રેકર્ડ પરની હકીકતોથી સ્પષ્ટ ફલિત થાય છે કે આરોપીઓએ ફરિયાદી પેઢી પાસેથી માલ લઈ તે માલની રકમ અદા કરવા ચેક આપી, તે ચેક પાસ થવા ન દઈ આરોપીએ ધી નેગોશીએબલ ઈન્સ્ટ્રુમેન્ટ એકટ હેઠળ ગંભીર પ્રકારનો ગુનો આચરેલ છે, જે રજૂઆતો ધ્યાને લઈ શ્રી સિદ્ધનાથ કોટેક્ષ પ્રા. લિ. અને તેના ડાયરેકટરો વીરેન સુરેશભાઈ લુણાગરીયા, દર્શન રમણીકભાઈ ભાલાળાનાઓને અદાલતમાં હાજર થવા સમન્સ ઈસ્યુ કરતો હુકમ ફરમાવવામાં આવેલો છે.
ઉપરોક્ત કામમાં ફરિયાદી શાહ રમેશચંદ્ર ભગવાનજીલાલ પેઢી વતી રાજકોટના જાણીતા એડવોકેટ સુરેશ ફળદુ, ભુવનેશ શાહી, કુણાલ શાહી, ચેતન ચોવટીયા, પાર્થ સંઘાણી, જસ્મીન દુધાગરા, જય પીઠવા તથા મદદમાં યુવરાજ વેકરીયા, નીરવ દોંગા, પ્રીન્સ રામાણી, ભાવીન ખુંટ, જયમલ મકવાણા રોકાયેલા હતા.
