ખાસ-ખબર ન્યૂઝ રાજકોટ
રાજકોટમાં દિવાળી પૂર્વે ખેડૂતો ખુશખુશાલ થઈ ગયા છે. કારણ કે, ખેડૂતો દ્વારા ઉત્પાદિત જણસી મોટા પ્રમાણમાં રાજકોટ યાર્ડમાં ઠાલવવામાં આવી રહી છે, જેનો સારો એવો ભાવ પણ જગતાતને મળી રહ્યો છે. જેમાં છેલ્લા ત્રણ દિવસ દરમિયાન રાજકોટ સ્થિત બેડી માર્કેટિંગ યાર્ડ ખાતે અંદાજે 50 હજાર મણ મગફળી ઉપરાંત 38,200 મણ કપાસ વેચાણ માટે આવ્યો હતો. આ સાથે જ યાર્ડમાં હાલમાં ખેડૂતોને સારા ભાવ મળી રહ્યા હોવાથી ખેડૂતોએ જીરું તેમજ તલ ઉપરાંત નવી સિઝનનો સોયાબીનનો જથ્થો પણ મોટી માત્રામાં વેચાણ માટે લાવ્યા હતા. ગત વર્ષે સારા અને સમયસર વરસાદને કારણે ખેડૂતો ખુશખુશાલ છે. ખરીફ મોસમાં રાજકોટ, મોરબી, જામનગર સહિતના જિલ્લામાં વરસાદી વિઘ્ન નડયું ન હોવાથી ખેડૂતોને મગફળીનો તેમજ કપાસનો બમ્પર પાક ઉતર્યો છે. જો કે, યાર્ડમાં હાલમાં મગફળીના ભાવ જીણીના 750 અને જાડી મગફળીના 750થી લઈ 1200 સુધીના ભાવ પ્રતિમણના ઉપજી રહ્યા છે. આ સાથે જ કપાસ પ્રતિમણના 1221થી 1560, જીરુંના 3150થી 3450, તલના 1470થી 2013 અને સોયાબીનના 580થી 856 સુધીના ભાવ મળી રહ્યા છે. દિવાળી નજીક આવતા જ ખેડૂતો શિયાળુ વાવેતર માટે તૈયારી અને દિવાળીના ખર્ચને પહોંચી વળવા મોટાપાયે જણસી વેચાણ માટે આવી રહ્યા છે. જેમાં ત્રણ દિવસમાં જ મગફળી, કપાસ, જીરું, તલ અને સોયાબીનની દોઢ લાખ મણથી વધુની આવક થઇ હતી. જેથી ખેડૂતોમાં પણ દિવાળી પૂર્વેની ખુશી જોવા મળી હતી.
