નવીન પટનાયકની પાર્ટીના ઉપાધ્યક્ષે કહ્યું- ગઠબંધન પર ચર્ચા ચાલું; ભાજપે કહ્યું- હાઈકમાન્ડ નક્કી કરશે
ખાસ-ખબર સંવાદદાતા
નીતિશ કુમારની JDU બાદ હવે ઓડિશાનું બીજુ જનતા દળ (BJD) પણ 2024ની લોકસભા ચૂંટણી પહેલા ગઉઅમાં જોડાઈ શકે છે. બુધવારે (6 માર્ચ), ભુવનેશ્વરમાં બીજેડીના મુખ્યમંત્રી નવીન પટનાયકના નિવાસસ્થાન નવીન નિવાસ ખાતે ચૂંટણી સંબંધિત લાંબી બેઠક યોજાઈ હતી. આ બેઠક બાદ બીજેડી ઉપાધ્યક્ષ દેબી પ્રસાદ મિશ્રાએ કહ્યું કે અમે ભાજપ સાથે ગઠબંધન પર ચર્ચા કરી રહ્યા છીએ. અમારી પાર્ટી ઓડિશાના લોકોના હિતને લઈને જરૂરી નિર્ણયો લેશે. બીજી તરફ ઓડિશામાં લોકસભા ચૂંટણી મામલે બુધવારે જ દિલ્હીમાં ભાજપની લાંબી બેઠક યોજાઈ હતી. આ બેઠક બાદ બીજેપી સાંસદ જુઆલ ઓરમે પણ એ વાતની પુષ્ટિ કરી છે કે ગઠબંધનને લઈને ચર્ચા થશે. તેમણે કહ્યું કે ગઠબંધન અંગે વાતચીત ચાલી રહી છે, પરંતુ અંતિમ નિર્ણય હાઈકમાન્ડ દ્વારા લેવામાં આવશે.
- Advertisement -
1998માં બીજેપી અને બીજેડી વચ્ચે ગઠબંધન હતું જે 2009માં તૂટી ગયું હતું. બંને પક્ષોએ 1998, 1999 અને 2004ની લોકસભા ચૂંટણી એકસાથે લડી હતી. આ સિવાય 2000 અને 2004ની વિધાનસભા ચૂંટણીમાં બંને પક્ષો સાથે મળીને લડ્યા હતા.
ખરેખરમાં બીજેડીને એનડીએની સૌથી ભરોસાપાત્ર પાર્ટી માનવામાં આવતી હતી. પરંતુ 2009ની લોકસભા ચૂંટણી અને વિધાનસભાની ચૂંટણીમાં બેઠકોની વહેંચણીના મુદ્દે ગઠબંધન તૂટી ગયું હતું. બીજેડી ઇચ્છતી હતી કે ભાજપ વિધાનસભાની 163માંથી 40 બેઠકો પર ચૂંટણી લડે, જ્યારે ભાજપ 63 બેઠકો પર ઉમેદવારો ઉભા રાખવા માગતી હતી.
તેમજ, બીજેડી પણ લોકસભા માટે 21માંથી 6 સીટો ભાજપને આપવા માંગતી હતી. જ્યારે ભાજપને 9 બેઠકો જોઈતી હતી. ગઠબંધન તૂટ્યા બાદ બીજેપી નેતા સુષ્મા સ્વરાજે કહ્યું હતું કે આ ગઠબંધન તોડવું નવીન પટનાયક માટે ભારે પડશે.
ઓડિશામાં લોકસભા અને વિધાનસભાની ચૂંટણી એક સાથે યોજાય છે. એનડીટીવીના અહેવાલ મુજબ, જો ગઠબંધન થશે તો ભાજપ લોકસભાની વધુ બેઠકો પર પોતાના ઉમેદવારો ઉભા કરશે. સાથે જ બીજેડી વિધાનસભા ચૂંટણી પર ફોકસ કરશે. ઓડિશામાં લોકસભાની 21 અને વિધાનસભાની 147 બેઠકો છે.
