ઉત્તરાખંડમાં મોટી દુર્ઘટના: દીવાલ ધરાશાયી થતાં 6 શ્રમિકોના નિધન, રેસ્કયૂ ઓપરેશન ચાલુ

ઈંટના ભઠ્ઠાની દિવાલ નીચે છ લોકો દટાઈ ગયા હતા અને મૃત્યુ પામ્યા હતા, જ્યારે બે લોકો ગંભીર રીતે ઘાયલ થયા.

ઉત્તરાખંડના રૂડકીમાં આજે વહેલી સવારે એક મોટી દુર્ઘટના સામે આવી છે. અહીં રૂરકીના મંગલોરના લહાબોલી ગામમાં ઈંટના ભઠ્ઠાની દીવાલ ધરાશાયી થતાં અનેક મજૂરો કાટમાળ નીચે દટાઈ ગયા હતા. અત્યાર સુધી આ અકસ્માતમાં 6 મજૂરોના મોત થયા છે. મળતી માહિતી મુજબ લહાબોલી ગામમાં ઈંટના ભઠ્ઠામાં કામ કરતા મજૂરો દિવાલ ધરાશાયી થતાં દટાઈ ગયા હતા. કાટમાળમાંથી કામદારોને બહાર કાઢવાની કામગીરી ચાલી રહી છે.

ઉત્તરાખંડના લહાબોલી ગામ પાસે મજરા માર્ગ પર સ્થિત ઈંટના ભઠ્ઠાની દિવાલ નીચે છ લોકો દટાઈ ગયા હતા અને મૃત્યુ પામ્યા હતા, જ્યારે બે લોકો ગંભીર રીતે ઘાયલ થયા હતા. ઘાયલોને સારવાર માટે હોસ્પિટલમાં દાખલ કરવામાં આવ્યા છે. વિગતો મુજબ આ અકસ્માત થયો ત્યારે કામદારો ઈંટો પકવવા માટે ભઠ્ઠામાં ઈંટો ભરી રહ્યા હતા.

મહત્વનું છે કે, હાલમાં જેસીબી વડે કાટમાળ હટાવીને ફસાયેલા લોકોને બહાર કાઢવામાં આવી રહ્યા છે. અકસ્માતની માહિતી મળતા જ સ્થાનિક વહીવટીતંત્ર અને પોલીસની ટીમ ઘટનાસ્થળે પહોંચી ગઈ હતી. મેડિકલ વિભાગની ટીમ પણ સ્થળ પર હાજર છે.