ભર શિયાળે માવઠું : મેઘરાજાએ થર્ટી ફર્સ્ટની મજા બગાડી, હજુ આજે આગાહી

માવઠા સાથે વર્ષ 2025ની વિદાય, વરસાદી માહોલમાં નવા વર્ષની ઉજવણી

ચણા, જીરું અને ઘઉં જેવા રવી પાકોને નુકસાન થવાથી ખેડૂતોની મુશ્કેલીમાં વધારો 

બુધવારે વહેલી સવારથી જ વાદળછાયું વાતાવરણ બાદ સાંજે 5 વાગ્યે વરસાદી ઝાપટા શરૂ થયા હતા

ખાસ-ખબર ન્યૂઝ રાજકોટ

વર્ષ 2025ના અંતિમ દિવસે જ્યારે લોકો નવા વર્ષના સ્વાગતની તૈયારીઓ કરી રહ્યા હતા, ત્યારે મેઘરાજાએ અચાનક એન્ટ્રી કરી હતી. રાજકોટ શહેર અને ગ્રામ્ય પંથક સહિત સૌરાષ્ટ્રના અનેક વિસ્તારોમાં વાતાવરણમાં એકાએક પલટો આવતા બુધવારે સાંજે કમોસમી વરસાદ વરસ્યો હતો. રાજકોટ શહેરમાં વહેલી સવારથી જ વાદળછાયું વાતાવરણ જોવા મળ્યું હતું. સાંજે 5 વાગતાની સાથે જ શહેરના કાલાવડ રોડ, યાજ્ઞિક રોડ અને રેસકોર્સ સહિતના વિસ્તારોમાં વરસાદી ઝાપટાં શરૂ થયા હતા. વરસાદ થંભી ગયા બાદ એસ્ટ્રોન ચોક, નાણાવટી ચોક, રૈયા ચોક સહિતના રોડ પર ટ્રાફિકજામ સર્જાયો હતો. આ ઉપરાંત વરસાદના કારણે અનેક નાની-મોટી પાર્ટીના આયોજનો ખોરવાઇ ગયા હતા. ભરશિયાળે વરસેલા કમોસમી વરસાદે ખેડૂતોની મુશ્કેલીમાં વધારો કર્યો છે. હાલ ખેતરોમાં ચણા, જીરું અને ઘઉં જેવા રવીપાકો તૈયાર થઈ રહ્યા છે, ત્યારે માવઠાને કારણે પાકને નુકસાન થવાની પૂરેપૂરી સંભાવના છે. હવામાન વિભાગની આગાહી અનુસાર, હજુ પણ ઉત્તર ગુજરાત અને સૌરાષ્ટ્રના જામનગર, મોરબી, દ્વારકા તથા કચ્છ જિલ્લામાં ગુરુવારે પણ હળવો વરસાદ પડી શકે છે.

વરસાદના કારણે હનુમાન ચાલીસા યુવા કથા મોકૂફ રખાઇ

વરસાદના કારણે રેસકોર્સ ખાતે આયોજીત હનુમાન ચાલીસા યુવા કથા મોકૂફ રાખવામાં આવી હતી. તેમજ હનુમાન જન્મોત્સવની ઉજવણી અને આતાશબાજીનો કાર્યક્રમ રદ કરવામાં આવ્યો હતો. દરમિયાન સિવિલ હોસ્પિટલના નવા ગેટની નીચે પાણી નિકાલની વ્યવસ્થાને અભાવે પાણી ભરાઇ ગયા હતા. જેથી સિવિલમાં આવતા જતા દર્દીઓઓ પરેશાન થયા હતા.