હળવદ પંથકમાંથી મોજશોખ માટે ટ્રેક્ટરની ટ્રોલી ચોરતી બેલડી ઝડપાઈ

ખાસ-ખબર સંવાદદાતા
હળવદ પંથકમાં છેલ્લા કેટલાક દિવસોથી ટ્રેકટરની ટ્રોલી ચોરી થવાના બનાવો સામે આવી રહ્યા હતા પરંતુ હળવદ પોલીસે મોજશોખ માટે ટ્રેક્ટરની ટ્રોલી ચોરતી તસ્કર બેલડીને ઝડપી લીધી હતી અને પોલીસે તસ્કરો પાસેથી બે ટ્રોલી અને એક ટ્રેક્ટર કબ્જે લઈને બંને આરોપીઓને રિમાન્ડ માટે કોર્ટમાં રજૂ કરવામાં આવતા નામદાર કોર્ટ દ્વારા એક દિવસના રિમાન્ડ મંજૂર કરવામાં આવ્યા હતા. આ બનાવ અંગે મળતી માહિતી મુજબ હળવદ પંથકમાં છેલ્લા કેટલાક સમયથી તસ્કર ટોળકી ટ્રેક્ટરોની ટ્રોલીને નિશાન બનાવીને ટ્રોલી ચોરતી હોવાના બનાવો વધતા પોલીસ આ ટોળકીને પકડી લેવા એક્શનમાં આવી હતી અને ચોક્કસ બાતમીના આધારે પોલીસે રાણેકપર રોડ પરથી જીજ્ઞેશભાઈ ભરતભાઈ ખેર (રહે. મેરૂપર) અને સચિનભાઈ બાબુભાઈ મેઘાણી (રહે. માનસર) ને ઝડપી લીધા હતા. પોલીસની પૂછપરછમાં આ બંને શખ્સોએ હળવદના સૂર્યનગર ગામના છગનભાઈ જીણાભાઈ દલવાડીના મકાનની બાજુમાં રાખેલ તેમના ટ્રેક્ટરની ટ્રોલી તેમજ હળવદ શહેરના વૈજનાથ મંદિર પાસેના શિવપાર્કમાં રહેતા કરશનભાઈ લક્ષ્મણભાઈ દલવાડીના ટ્રેક્ટરની ટ્રોલીની ચોરી કર્યાની કબૂલાત આપતા પોલીસે આ બંને આરોપીઓ પાસેથી બંને ચોરાઉ ટ્રોલી ઉપરાંત એક ટ્રેક્ટર કબ્જે કર્યું હતું. આ બંને શખ્સો મોજશોખ ખાતર ટ્રોલી ચોરી કરતા હતા અને રાત્રે ટ્રેક્ટર લઈને ફરતા હોય ત્યારે અવાવરું જગ્યાએ રેઢી પડેલી ટ્રોલીની ચોરી કરી તેમાં રહેલા લખાણ ભૂંસીને કલર કરી નાખતા હોવાનું ખુલ્યું છે. પોલીસે આ બંને શખ્સોને રિમાન્ડ માટે કોર્ટમાં રજૂ કરતા નામદાર કોર્ટ દ્વારા એક દિવસના રિમાન્ડ મંજૂર કરવામાં આવ્યા હતા.