બેન્કો હવે તેના ધિરાણના ‘સ્ટ્રેસ’ ટેસ્ટમાં કલાઈમેટ ચેઈન્જનો કરશે સમાવેશ

-વરસાદ-ગરમીની બદલાયેલી પેટર્નથી અનેક વ્યાપાર ધંધા પર અવળી અસર પડી શકે છે: ધિરાણ પરના જોખમો તપાસાશે

દેશમાં હવામાનની સતત ચાલી રહેલી અનિશ્ચિતતાથી બેન્કોના ધિરાણ પર આગામી સમયમાં અસર થશે તેથી બેન્કો હવે તેના ધિરાણના ‘સ્ટ્રેસ’ ટેસ્ટમાં કલાઈમેટ ચેઈન્જનો પણ સમાવેશ કરશે. બેન્કો માટે આ અંગેની એક ગાઈડલાઈન રીઝર્વ બેન્ક ઓફ ઈન્ડીયા કરશે.

રીઝર્વ બેન્ક ઓફ ઈન્ડીયાએ હાલમાંજ એક અભ્યાસ કર્યો હતો જેમાં છેલ્લા પાંચ વર્ષમાં જે રીતે વરસાદી પેટર્ન બદલાઈ છે તથા ભરપુર ચોમાસુ ભારે ગરમી આ તમામ હવામાન સંબંધી કારણો પણ ફકત કૃષિ જ નહી અનેક પ્રકારના વ્યાપાર ધંધા પર અસર કરી રહી છે જેના કારણે આ ક્ષેત્રમાં બેન્કોના ધિરાણમાં રીસ્ક ફેકટર પણ બદલાઈ શકે છે.

વાતાવરણમાં બદલાવ વિ. કારણે બેન્કોના માર્જીન પર પણ અસર થઈ રહી છે. બેન્કો કલાઈમેટ ચેન્જની તેમના ધિરાણ પરની અસર તથા જોખમ અંગે અભ્યાસ કરીને તે મુજબ તેની કેટેગરી નિશ્ચિત કરે તેવું રિઝર્વ બેન્ક ઈચ્છે છે. કલાઈમેટ-રીલેટેડ ફાયનાન્સીયલ રીસ્ક-એ વિષય પર રીઝર્વ બેન્કે નિષ્ણાંતો પાસેથી તેમના મંતવ્યો માંગ્યા હતા.

જો કે જેમ હવામાનની આગાહી મુશ્કેલ બની છે તેમ તેના જોખમો અંગે પણ કોઈ ચોકકસ તારણ મુશ્કેલ છે છતાં બેન્કો એક ફોર્મ્યુલા નિશ્ચિત કરી શકે છે. હવામાન સંબંધી ફેરફારની તિવ્રતા અને તેની ફ્રીકવન્સી વિ. પણ તેમાં ધ્યાનમાં લઈ શકાય છે તો બીજી તરફ કલાઈમેટ ફ્રેન્ડલી ઈન્વેસ્ટમેન્ટ હવામાનમાં બદલાવના કારણે જે વ્યાપાર-ધંધા-ઉદ્યોગને માટે તક પણ સર્જાઈ શકે છે તેનો પણ અભ્યાસ થશે.