દિલ્હીમાં પ્રદુષણ ઘટાડવા બાંધકામ પ્રવૃત્તિ પર પ્રતિબંધ: મજૂરોને મહિને રૂ. 5000 આપશે કેજરીવાલ સરકાર

પાટનગરમાં હવાનું પ્રદુષણ ચરમસીમાએ: વહેલી સવારે શ્વાસ લેવાનું મુશ્કેલ

ફરી એક વખત વાહનોમાં ઓડ-ઇવનની તૈયારી : જાહેર ટ્રાન્સપોર્ટનો ઉપયોગ કરવા રાજ્ય સરકારની અપીલ

પાટનગર દિલ્હીમાં શિયાળાના આગમન સાથે જ પ્રદુષણ વધવા લાગતા હવે હવા ઝેરી બનવા લાગી છે અને એક તરફ પાડોશી ત્રણ રાજ્યોમાં ખેડૂતો દ્વારા પલારી સળગાવવાનું સતત ચાલુ રાખતા દિલ્હી અને આસપાસના વિસ્તારોમાં સવારથી જ શિયાળાના ગાઢ ધૂમ્મસ સાથે ભારે પ્રદૂષણની પરિસ્થિતિ સર્જાતા દિલ્હી સરકાર હવે લોકોને વર્ક ફ્રોમ હોમની નીતિ લાગુ કરી શકે છે.

દિલ્હીમાં આજે મુખ્યમંત્રી અરવિંદ કેજરીવાલે જાહેર કર્યું હતું કે, પ્રદૂષણને કારણે બાંધકામ પ્રવૃતિ પર રોક લાગી ગઇ છે અને તેના પરિણામે બાંધકામ સાથે જોડાયેલા અંદાજે 1 લાખ જેટલા કારીગરો બેકાર થઇ ગયા છે તેમના માટે દિલ્હી સરકાર ત્રણ માસ માટે દર મહિને રુા. 5000ની સહાય અપાશે. આ રકમ ડાયરેક્ટ બેનીફીટ ટ્રાન્સફર હેઠળ આ કામદારોના ખાતામાં જમા થઇ જશે.

જ્યારે બીજી તરફ રાજ્યમાં હવે ફરી એક વખત ગાડીઓ માટે ઓડ-ઇવન સિસ્ટમ પણ દાખલ થઇ શકે છે. રાજ્યના પર્યાવરણ મંત્રી શ્રી ગોપાલ રાયે દિલ્હીવાસીઓને વાહનથી થનારા પ્રદૂષણને ઘટાડવા માટે જાહેર ટ્રાન્સપોર્ટનો ઉપયોગ કરવા અથવા કાર શેરીંગનો પ્રયોગ કરવા અપીલ કરી છે. આ ઉપરાંત જ્યાં બાંધકામ ચાલુ છે તેની માહિતી દિલ્હી એપ પર મોકલવા જણાવાયું છે.

ઉપરાંત કોલસા કે લાકડા સળગાવવા પર પ્રતિબંધ મુકાયો છે. જો કે ભારે ઠંડીના કારણે અહીં ગરીબ વિસ્તારોમાં અહીં તાપણા વગેરે પણ થાય છે. દિલ્હી સરકારે મોટા વર્ગને વીજળી હીટરનો પ્રયોગ કરવા અપીલ કરી છે. દિલ્હીમાં પ્રદુષણ ઘાતક સ્તરે પહોંચી ગયું છે અને હજુ શિયાળો વધતો જતા પ્રદુષણની માત્રા પણવધશે તેવા સંકેત છે.