એર ઇન્ડિયાના વિમાનમાં ફરી એકવાર બોમ્બ હોવાની ધમકી મળી છે. 189 મુસાફરો સાથે દુબઈથી ઉડાન ભરેલી એર ઇન્ડિયાનાની ફ્લાઈટનું જયપુર એરપોર્ટ પર ઈમરજન્સી લેન્ડિંગ કરવામાં આવ્યું છે.
ફેસ્ટિવ સિઝનમાં ફ્લાઇટમાં બોમ્બ હોવાના સમાચાર દરરોજ સામે આવી રહ્યા છે. ખાસ કરીને એર ઇન્ડિયાના વિમાનોને આવી ધમકીઓ આપવામાં આવી રહી છે. દુબઈથી ઉડાન ભરી રહેલી ફ્લાઈટમાં ફરીથી બોમ્બ હોવાની સૂચના મળી. ફ્લાઈટમાં 189 મુસાફરો સવાર હતા. આ સમાચારથી બધા ચોંકી ગયા. મુસાફરોમાં પણ અફરાતફરીનો માહોલ સર્જાયો હતો. દુબઈથી ભારત આવી રહેલી આ ફ્લાઈટનું રાજસ્થાનના જયપુર એરપોર્ટ પર ઈમરજન્સી લેન્ડિંગ કરાવવામાં આવ્યું. ફ્લાઈટમાં બોમ્બ હોવાની માહિતી શનિવારે રાત્રે 12:15 કલાકે ઈમેલ દ્વારા આપવામાં આવી હતી.
- Advertisement -
શું છે સમગ્ર મામલો?
જયપુર એરપોર્ટ પોલીસના એસએચઓ સંદીપ બસેરાના જણાવ્યા અનુસાર, એર ઈન્ડિયાની ફ્લાઈટ IX-196 એ ગઈકાલે રાત્રે દુબઈથી જયપુર માટે ટેક ઓફ કર્યું હતું. જેવી ફ્લાઈટ ભારતીય સરહદમાં પ્રવેશી કે તરત જ એક ઈમેલ આવ્યો. જેમાં લખ્યું હતું કે આ ફ્લાઈટમાં બોમ્બ છે. એરપોર્ટ ઓથોરિટીને લગભગ 12:45 વાગ્યે આ મેઈલ મળ્યો અને ફ્લાઈટને 1:20 વાગ્યે જયપુર એરપોર્ટ પર લેન્ડ કરવામાં આવી.
સતત 6 દિવસથી મળી રહી છે ધમકીઓ
- Advertisement -
જો અહેવાલોનું માનીએ તો, તમામ મુસાફરોને ફ્લાઇટમાંથી સુરક્ષિત રીતે બહાર કાઢવામાં આવ્યા હતા અને તે પછી સમગ્ર ફ્લાઇટની તપાસ કરવામાં આવી હતી. ફ્લાઈટમાં કોઈ શંકાસ્પદ વસ્તુ મળી નથી. એવી અટકળો છે કે આ ફેક મેસેજ હતો.
10 થી વધુ એકાઉન્ટ સસ્પેન્ડ
અહેવાલો અનુસાર, શનિવારે સતત છઠ્ઠા દિવસે એક ફ્લાઈટમાં બોમ્બ હોવાની જાણ થઈ છે. બોમ્બની ધમકી આપનાર લોકોની શોધ કરવામાં આવી રહી છે. છેલ્લા 6 દિવસમાં પોલીસે 10થી વધુ સોશિયલ મીડિયા એકાઉન્ટને સસ્પેન્ડ અને બ્લોક કર્યા છે. આ પહેલા શુક્રવારે દિલ્હીથી લંડન જઈ રહેલી વિસ્તારા એરલાઈનની ફ્લાઈટમાં પણ બોમ્બ હોવાની માહિતી મળી હતી, જેના કારણે ફ્લાઈટને ફ્રેન્કફર્ટ તરફ ડાયવર્ટ કરવામાં આવી હતી અને ફ્લાઈટનું ઈમરજન્સી લેન્ડિંગ કરવામાં આવ્યું હતું.
40 ફ્લાઈટને મળ્યું બોમ્બ એલર્ટ
શુક્રવારે જ અકાસા એરલાઈન્સની ફ્લાઈટ QP 1366ને પણ ટેકઓફ પહેલા સિક્યોરિટી એલર્ટ મળ્યું હતું. આ ફ્લાઈટ બેંગલુરુથી મુંબઈ જઈ રહી હતી. એલર્ટ મળ્યા પછી, ફ્લાઇટનું ચેકિંગ કરવામાં આવી, જેના કારણે ફ્લાઇટ પણ મોડી પડી. જો આંકડાઓ પર વિશ્વાસ કરવામાં આવે તો છેલ્લા કેટલાક દિવસોમાં ભારત સાથે જોડાયેલી 40 ફ્લાઈટોમાં બોમ્બ એલર્ટ મોકલવામાં આવ્યા છે. આ લિસ્ટમાં એર ઈન્ડિયાના 4, વિસ્તારાના 2 અને ઈન્ડિગોના 1 વિમાનનો સમાવેશ થાય છે.
