અનીલ ઓઝાનો કલેકટર કચેરીમાં ફિનાઈલ પીને કર્યો આપઘાતનો પ્રયાસ: અટકાયત

ગોંડલની જમીનના વર્ષો જૂના જનતા સોસાયટીની જમીન વિવાદ મામલો

ખાસ-ખબર સંવાદદાતા
ગોંડલની જમીનના વર્ષો જૂના જનતા બાગ સોસાયટીની જમીનના વિવાદમાં અનીલ ઓઝાએ આજે કલેકટર કચેરીમાં ફીનાઈલ પીવાનું નાટક કર્યું હતું, પરંતુ અનીલ ઓઝા નાટક પાર પાડે એ પહેલાં પ્ર.નગર પોલીસના કાફલાએ કલેકટર કચેરીમાં દોડી આવી અનીલ ઓઝાની અટકાયત કરી પોલીસ સ્ટેશને ઉઠાવી ગયેલ હતી.

અનીલ ઓઝાએ આ પૂર્વે કલેકટર કચેરીમાં અગાઉ પણ અનેક વખત ધમાલ કરી છે. અગાઉ આ કચેરીમાં કાચનો ભુક્કો બોલાવી દીધો હતો તેમજ પ્રથમ માળેથી આત્મહત્યાનો પણ પ્રયાસ કર્યો હતો તેમજ થોડા સમય પહેલાં કલેકટર કચેરીના બસ સ્ટોપ બહાર સીટી બસની આડે પણ સૂઈ જઈ બસને થોભાવી દીધી હતી. આજે અનીલ ઓઝાએ વધુ એક વખત કલેકટર કચેરીમાં ધસી આવી ગોંડલની જનતા બાગ સોસાયટીના જમીનના વિવાદ અગાઉ થયેલ પોલીસ ફરિયાદની નકલની માગણી કરી ફીનાઈલ ગટગટાવવાનું નાટક કર્યું હતું તેમજ પ્રથમ માળેથી કુદકો મારવાનું પણ તે જણાવતો હતો પરંતુ ઓઝા નાટક કરે એ પહેલાં પોલીસ કાફલાએ તેની અટકાયત કરી હતી.