‘અમેરિકા કોલ્ડ વૉરનું સંકટ પેદા કરી રહ્યું છે, અમે પણ પરમાણું હથિયાર તૈનાત કરીશું’

જર્મનીમાં મિસાઈલ તૈનાત કરવા સામે પુતિને ચેતાવણી આપી

ખાસ-ખબર ન્યૂઝ નવી દિલ્હી, તા.29

રશિયાના રાષ્ટ્રપતિ વ્લાદિમીર પુતિને અમેરિકાને ચેતાવણી આપી છે. તેમણે કહ્યું કે જો અમેરિકા જર્મનીમાં લાંબા અંતરની મિસાઇલો તૈનાત કરશે તો તેના જવાબમાં રશિયા પણ પશ્ચિમી દેશોની રેન્જમાં આવતી ઘાતક મિસાઇલો તૈનાત કરશે.

રોઇટર્સના અહેવાલ મુજબ, આ મહિનાની શરૂઆતમાં યુએસએ કહ્યું હતું કે નાટો તેના સહયોગી દેશોની સુરક્ષા માટે વર્ષ 2026થી જર્મનીમાં લાંબા અંતરની મિસાઇલો તૈનાત કરવાનું શરૂ કરશે. ક્રુઝ મિસાઈલ ઉપરાંત તેમાં હાઈપરસોનિક મિસાઈલ પણ હશે.

તેના જવાબમાં પુતિને કહ્યું કે અમેરિકા શીત યુદ્ધ દરમિયાન મિસાઈલ કટોકટી જેવી સ્થિતિ સર્જી રહ્યું છે. 1962માં રશિયાએ ક્યુબામાં મિસાઇલો તૈનાત કરી. આ સ્થળ અમેરિકાથી માત્ર 150 કિમી દૂર હતું. જેના કારણે રશિયા અને અમેરિકા પરમાણુ યુદ્ધની અણી પર આવી ગયા હતા.

રશિયાના નેવી ડેના અવસર પર રવિવારે પોતાના સંબોધનમાં પુતિને કહ્યું કે જો નાટો આવું પગલું ભરશે તો મિસાઈલને જર્મનીથી રશિયા પહોંચવામાં માત્ર 10 મિનિટનો સમય લાગશે. તેમણે વધુમાં કહ્યું કે અમેરિકા જર્મનીમાં મિસાઈલો તૈનાત કરવાની અને ડેનમાર્ક અને ફિલિપાઈન્સને ટાયફૂન મિસાઈલ સિસ્ટમ આપવાની વાત કરીને તણાવ વધારી રહ્યું છે.

પુતિને અમેરિકાના પગલાની સરખામણી 1979માં પશ્ચિમ યુરોપમાં પર્શિંગ-2 મિસાઈલ લોન્ચર્સની તૈનાતી સાથે કરી હતી. સોવિયત યુનિયનના તત્કાલીન જનરલ સેક્રેટરી યુરી એન્ડ્રોપોવના જણાવ્યા અનુસાર, અમેરિકા પરશિંગ મિસાઇલો તૈનાત કરીને સોવિયત સંઘના રાજકીય અને લશ્કરી નેતૃત્વને ખતમ કરવા માંગતું હતું.
પુતિને ફરી કહ્યું કે હવે ફરીથી શીત યુદ્ધ જેવી સ્થિતિ સર્જાઈ રહી છે. આનો જવાબ આપવા માટે રશિયા પરમાણુ ટેક્નોલોજીથી સજ્જ મધ્યવર્તી અને ટૂંકા અંતરની મિસાઇલોનું ઉત્પાદન શરૂ કરશે અને પછી તેને ક્યાં તૈનાત કરવી તે અંગે વિચારણા કરશે.

પોલિટિકોના અહેવાલ મુજબ, વર્ષ 1987માં અમેરિકા અને સોવિયત સંઘ વચ્ચે ઇન્ટરમીડિયેટ-રેન્જ ન્યુક્લિયર ફોર્સિસ એગ્રીમેન્ટ પર હસ્તાક્ષર કરવામાં આવ્યા હતા. આ અંતર્ગત બંને દેશોએ 500 કિમીથી વધુની રેન્જવાળી પરમાણુ મિસાઈલ વિકસાવવા માટે સહમતિ દર્શાવી હતી.

32 વર્ષ બાદ અમેરિકા 2019માં આ કરારમાંથી ખસી ગયું હતું. અમેરિકાએ આરોપ લગાવ્યો હતો કે રશિયા 9ખ729 મિસાઈલ વિકસાવીને કરાર તોડી રહ્યું છે. આ પછી તત્કાલીન અમેરિકી રક્ષા સચિવ માર્ક એસ્પરે કહ્યું હતું કે તેઓ પણ રશિયન મિસાઈલના જવાબમાં લાંબા અંતરના હથિયારો બનાવશે.