ઊના-ગીરગઢડા રોડ પર બાઈક અને ટ્રેક્ટર વચ્ચે અકસ્માત: બાઈક ચાલકનું ઘટનાસ્થળે જ મોત

ખાસ-ખબર ન્યૂઝ ઉના, તા.5

ઉના નજીક ગીરગઢડા રોડ પર રાત્રીના સમયે બાઈક અને ટ્રેક્ટર વરચે જોરદાર અકસ્માત સર્જાયો હતો. ઉનાના વરસિંગપુર ગામે રહેતો કૃણાલ પ્રતાપભાઈ સોલંકી પોતાની બાઈક પર ઉના-ગીરગઢડા રોડ પરથી ઘરે જઈ રહ્યો હતો. ત્યારે ટ્રેક્ટરચાલકે બાઈકને અડફેટે લેતા જોરદાર અકસ્માત સર્જાયો હતો. જેમાં બાઇક ચાલક ટ્રેક્ટરની નીચે આવી જતા તેનું ઘટનાસ્થળે જ કમકમાટી ભર્યું મોત નીપજ્યું હતું. જયારે ટ્રેક્ટર ચાલક અકસ્માત સર્જી નાસી ગયો હતો.

આ અકસ્માત સર્જાતાં સ્થાનિક વાહન ચાલકોએ ટ્રેક્ટર નીચે દબાયેલા યુવકને બહાર કાઢ્યો હતો. આ અકસ્માત સર્જનાર ટ્રેક્ટરમાં પણ આગ લાગતાં ઉના નગરપાલિકા ફાયબ્રિગેડની ટીમે ઘટનાસ્થળે પહોંચી આગ ઉપર કાબૂ મેળવ્યો હતો. યુવાનને પીએમ અર્થે હોસ્પિટલે ખસેડવામાં આવ્યો હતો. આ અંગે પોલીસે આગળની વધુ તપાસ હાથ ધરવા તજવીજ શરૂ કરી છે.