તીનપત્તીમાં રૂપિયા હારી જતા યુવકે આજીડેમમાં ઝંપલાવી જીવન ટૂંકાવ્યું

સુસાઈડ પહેલા વીડિયો બનાવ્યા, જેમાં તે બોલે છે કે, તીનપત્તી માસ્ટરમાં રૂપિયા હારી ગયો છું, મમ્મી-પપ્પા મને માફ કરશો

 પિતાએ મોબાઈલનું નેટ શરૂ કરતા વીડિયો જોતા તેઓની પગ તળેથી જમીન સરકી ગઈ

ખાસ-ખબર સંવાદદાતા
રાજકોટમાં આજીડેમમાં ઝંપલાવી ભરયુવાનીમાં ઈઅનો અભ્યાસ કરતા શુભમ બગથરિયા (ઉં.વ.21)એ જિંદગી ટૂંકાવતા પરિવારમાં અરેરાટી મચી ગઈ છે. યુવકે આપઘાત કરતા પહેલા પોતાના મોબાઈલમાં બે વીડિયો બનાવ્યા હતા. જેમાં તે બોલે છે કે, ‘તીનપત્તી માસ્ટરમાં રૂપિયા હારી ગયો છું, મારી પાસે એટલા પાપ છે કે શબ્દોમાં બયાન કરી શકતો નથી’ વીડિયો બનાવ્યા બાદ યુવક આજીડેમમાં કૂદી ગયો હતો. ઘટનાની જાણ થતા જ ફાયરબ્રિગેડની ટીમ દોડી આવી છે અને તેના મૃતદેહની શોધખોળ હાથ ધરી છે.

શુભમે ગઈકાલે સાંજે વીડિયો બનાવી તેના પપ્પાને મોકલ્યો હતો. પરંતુ પપ્પાનું નેટ બંધ હતું. સાંજે 7 વાગ્યે નેટ શરૂ કરતા વીડિયો જોતા તેઓની પગ તળેથી જમીન સરકી ગઈ હતી. બાદમાં રાતભર પરિવાર તેમને શોધવા નીકળી ગયો હતો. આજે સવારે લોકેશન મળતા વહેલી સવારે 5 વાગ્યાથી શુભમના મૃતદેહની શોધખોળ હાથ ધરી છે. યુવક વીડિયોમાં તીનપત્તી ગેમમાં એક લાખથી વધુ રૂપિયા હારી ગયાનું બોલે છે. જેમાં તેણે અલગ અલગ વ્યક્તિ પાસેથી પૈસા લીધા હતા તેવો ઉલ્લેખ કર્યો છે. માત્ર આ જ કારણ નહીં અન્ય પણ કેટલાક કારણોને લઈને આપઘાત કરતો હોવાનું વીડિયોમાં જણાવ્યું છે. ઘટનાની જાણ થતા પોલીસ પણ દોડી આવી છે અને તપાસ હાથ ધરી છે.

વીડિયોમાં શું બોલ્યો યુવક?
‘બહુ મહેનત કરી મેં, આ સ્ટેપ ઉઠાવવા માટે હું મજબૂર છું. કારણ કે, મારી પાસે એટલા પાપ થઈ ગયા છે કે શબ્દોમાં બયાન કરી શકતો નથી. આજી નદી છે…હું કૂદુ છું, મારી જાન દઉં છું, કોઈનો કાંઈ વાંક નથી, મારા શેઠ બધા સારા હતા. તેના 65 હજાર રૂપિયા, હર્ષના 30 હજાર, અશ્વિનભાઈના 20 હજાર અને 15 હજાર તેના શેરના, ઓનલાઈન તીનપત્તી માસ્ટરમાં હું હારી ગયો. એટલે જાન નથી દેતો, કારણ છે કેટલાય. જિંદગીથી થાકી ગયો છું હું, હવે હું સુસાઈડ કરવા માગું છું. બહુ થઈ ગયું… પપ્પા-મમ્મી આઈ લવ યુ…હસતા રહેજો અને બની શકે તો મને માફ કરી દેજો. અને મારા વગર જિંદગી જીવવાની ટ્રાય કરજો. પ્લીઝ…જિંદગી જીવજો. પપ્પા મારી ગાડી આજીડેમ પાસે નદી છે ત્યાં ભરવાડ પાસે પડી છે, વેચીને જેટલા પૈસા આવે તે ચૂકવાય એને ચૂકવી દેજો. બસ આટલું જ કહેવું છે, જાઉં છું હવે. આટલું બોલી હાથથી બાય બાય કર્યું હતું’