મોરબીના નવા બસ સ્ટેન્ડ સામે સરદાર પટેલની સાથે શહીદ વિરોની પ્રતિમા મુકાશે

 સેવા એ જ સંપત્તિ ફાઉન્ડેશન, પાટીદાર નવરાત્રી મહોત્સવ આશરે 15 લાખના ખર્ચ કરશે

ખાસ-ખબર સંવાદદાતા
મોરબીના નવા બસ સ્ટેન્ડ સામે સેવા એ જ સંપત્તિ ફાઉન્ડેશન અને પાટીદાર નવરાત્રી મહોત્સવ મહોત્સવના મુખ્ય આયોજક અજય લોરીયા દ્વારા સરદાર પટેલની નવી પ્રતિમા મૂકવામાં આવશે અને તેની સાથે ક્રાંતિવીરો શહીદ ભગતસિંહ, સુભાષચંદ્ર બોઝ, રાજગુરુ અને ચંદ્રશેખર આઝાદની પ્રતિમા પણ મુકવામાં આવશે.

મોરબીના સેવાભાવી અને દેશભક્ત યુવાન અજય લોરીયા દ્વારા નવા બસ સ્ટેન્ડ સામે આવેલ સરદાર પટેલની પ્રતિમાને નવી બનાવીને મૂકવામાં આવશે અને સર્કલને પણ રિનોવેશન કરવામાં આવશે. અહીં લોખંડી પુરુષની સરદાર પટેલની સાથે દેશની આઝાદીમાં મહત્વનું યોગદાન આપનાર શહીદ વીર જવાનો ચંદ્રશેખર આઝાદ, ભગતસિંહ, રાજગુરુ અને સુભાષચંદ્ર બોઝની પ્રતિમા પણ સરદાર પટેલની પ્રતિમા પહેલા મૂકવામાં આવશે.

આ પ્રતિમા ઘડવાનું કાર્ય હાલ થાનના એક કારીગર દ્વારા કરવામાં આવી રહ્યું છે જે થોડા સમયમાં પૂર્ણ થશે અને માતાજીના નવલા નોરતાના પ્રથમ દિવસે આ પ્રતિમાઓનું અનાવરણ કરવામાં આવશે.

આ ઉપરાંત અહીં રાષ્ટ્રધ્વજ પણ બંને બાજુ લગાડવામાં આવશે તેમ સેવા એ જ સંપત્તિ ફાઉન્ડેશનના ચેરમેન અને પાટીદાર નવરાત્રી મહોત્સવના આયોજક અજય લોરીયા દ્વારા જણાવવામાં આવ્યું હતું. વધુમાં આર્કિટેક્ટ યોગેશ બાપોદરિયાએ સુંદર મજાની સર્કલની ડિઝાઈન વિનામૂલ્યે બનાવી આપી છે.