મોરબીના બેલા નજીકથી ટ્રકના ટૂલ બોક્સમાં છુપાવેલો દારૂ-બિયરનો જથ્થો ઝડપાયો

ટ્રક સહિત રૂ. 10.31 લાખના મુદ્દામાલ સાથે એક શખ્સની ધરપકડ
ખાસ-ખબર સંવાદદાતા
મોરબી તાલુકા પોલીસે બાતમીના આધારે મોરબી તાલુકાના બેલા ગામની સીમમાં ખોખરા હનુમાન રોડ ઉપર શ્યામ હોટલ પાસે દરોડો પાડીને ટ્રકના ટૂલ બોક્સમાં છુપાવેલ વિદેશી દારૂના જથ્થા સાથે એક શખ્સને ઝડપી પાડ્યો હતો. મોરબી તાલુકા પોલીસ સ્ટાફને સંયુકત રાહે બાતમી મળી હતી કે, આરજે 19 જીઈ 6045 નંબરના ટ્રકમાં વિદેશી દારૂનો જથ્થો ભરેલ હોય અને આ ટ્રક મોરબી તાલુકાના બેલા (રંગપર) થી ખોખરા હનુમાન રોડ તરફ જનાર છે જે મળેલ બાતમીની જાણ મોરબી તાલુકા પોલીસ ઈન્સ્પેકટર કે. એ. વાળાએ ડીવાયએસપી પી. એ. ઝાલાને કરતા ડીવાયએસપીની સૂચનાને આધારે મોરબી તાલુકા પોલીસ સ્ટાફની અલગ અલગ ટીમોએ બેલા ગામની સીમમાં ખોખરા હનુમાન રોડ ઉપર શ્યામ હોટલ પાસે વોચ ગોઠવીને તપાસ કરતા બાતમીવાળા ટ્રકના ટૂલ બોક્સમાંથી રૂ. 31,200 ની કિંમતની અલગ અલગ બ્રાન્ડની વિદેશી દારૂ અને બીયરની બોટલો મળી આવી હતી જેથી પોલીસે દારુ બીયરનો જથ્થો અને ટ્રક મળી કુલ રૂ. 10,31,200 નો મુદ્દામાલ કબ્જે કરી આરોપી હેમારામ હનુમાનરામ ગોદારા (રહે. પાલ ભાખરી કરના, તા. સિંઘરી, જી.બાડમેર, રાજસ્થાન) ની અટકાયત કરીને ધોરણસરની કાર્યવાહી હાથ ધરી હતી.