મોરબીના કુબેરનગરમાં રહેણાક મકાનમાંથી વિદેશી દારૂનો જથ્થો ઝડપાયો, એકની ધરપકડ

ખાસ-ખબર સંવાદદાતા
મોરબીના કુબેરનગરમાં આવેલ રહેણાક મકાનમાં મોરબી સીટી એ ડિવિઝન પોલીસે બાતમીને આધારે દરોડો પાડીને મકાનમાંથી વિદેશી દારૂનો જથ્થો ઝડપી પાડ્યો હતો. પોલીસે વિદેશી દારૂ સાથે એક શખ્સની ધરપકડ કરીને રૂપિયા 32 હજારથી વધુનો મુદ્દામાલ કબ્જે કર્યો હતો.
મોરબી સીટી એ ડિવિઝન પોલીસની ટીમ પેટ્રોલિંગમાં હતી તે દરમિયાન પોલીસને ચોક્કસ બાતમી મળી હતી કે, યમુનાનગરમાં રહેતા ધીરજ ગોવિંદભાઈ ચાવડા અને કુબેરનગરમાં રહેતા અરવિંદ રામભાઈ ચાવડા નામના બંને શખ્સો અરવિંદના મકાનમાં વિદેશી દારૂનો જથ્થો રાખીને વેચાણ કરે છે જે બાતમીને આધારે પોલીસ સ્ટાફે દરોડો પાડતા મકાનમાંથી રૂપિયા 32,300 ની કિંમતની વિદેશી દારૂની 77 બોટલો મળી આવી હતી જેથી પોલીસે દારૂના જથ્થા સાથે આરોપી ધીરજ ગોવિંદભાઈ ચાવડાની ધરપકડ કરી હતી જ્યારે આરોપી અરવિંદ હાજર નહીં મળી આવતા પોલીસે બંને શખ્સો વિરૂદ્ધ પ્રોહિબિશન એક્ટ અન્વયે કાર્યવાહી કરીને આરોપી અરવિંદને ઝડપી પાડવા કવાયત હાથ ધરી છે.