હવે મુંબઈમાં વાનખેડેથી પણ મોટું અને આધુનિક સ્ટેડિયમ બનશે

ચેમ્પિયન ટીમ ઈન્ડિયાએ પણ બાર્બાડોસથી પરત ફર્યા બાદ મુંબઈમાં ખુલ્લી બસ સાથે વિજય પરેડ યોજી હતી. આ જીત અને વિજય પરેડ પછી મુંબઈથી ટીમ ઈન્ડિયાના ટીમના સભ્યો, રોહિત શર્મા, સૂર્યકુમાર યાદવ, યશસ્વી જયસ્વાલ અને શિવમ દુબેને મહારાષ્ટ્ર વિધાનસભામાં આમંત્રણ આપવામાં આવ્યું હતું. રોહિત શર્માએ વિધાનસભામાં મરાઠીમાં ભાષણ પણ આપ્યું હતું. હવે આ બધી બાબતો પછી ડેપ્યુટી સીએમ દેવેન્દ્ર ફડણવીસે નવા સ્ટેડિયમ વિશે વાત કરી. તેમણે કહ્યું કે, હવે મુંબઈને આધુનિક સ્ટેડિયમની જરૂર છે. એક સ્ટેડિયમ કે જે વધુ દર્શકોને સમાવી શકે.

નાયબ મુખ્યમંત્રીએ આપ્યા સંકેત

મહારાષ્ટ્રના નાયબ મુખ્યમંત્રી દેવેન્દ્ર ફડણવીસે કહ્યું, મુંબઈને હવે વાનખેડે કરતાં મોટા સ્ટેડિયમની જરૂર છે. હું જાણું છું કે વાનખેડે એક ઐતિહાસિક સ્ટેડિયમ છે પરંતુ હવે મુંબઈને 1 લાખથી વધુની ક્ષમતાવાળા નવા સ્ટેડિયમની જરૂર છે અને અમે ભવિષ્યમાં તેને બનાવવાનો પ્રયાસ કરીશું. અહી નોંધનિય છે કે, જોકે નવા સ્ટેડિયમના નિર્માણ અંગે હજુ સુધી કોઈ જાહેરાત કરવામાં આવી નથી.

આવો જાણીએ શું છે વાનખેડે સ્ટેડિયમનો ઇતિહાસ ?

મહારાષ્ટ્રના મુંબઈમાં આવેલ આ  વાનખેડે સ્ટેડિયમ 1974માં બનાવવામાં આવ્યું હતું. આ સ્ટેડિયમમાં અંદાજે 32,000 લોકો બેસી શકે છે. આ એ જ ઐતિહાસિક મેદાન છે જ્યાં ટીમ ઈન્ડિયાએ MS ધોનીની કપ્તાનીમાં 2011 ODI વર્લ્ડ કપની ફાઈનલ જીતી હતી. ધોનીએ આ મેદાન પરથી સિક્સર ફટકારીને 2011ની ODI વર્લ્ડ કપની ટ્રોફી ઉપાડી હતી.