વેરાવળના એર ફોર્સમાં ફરજ બજાવતાં જવાનનું બાઈક અકસ્માતમાં મોત

ગાર્ડ ઓફ ઓનર સાથે અંતિમ વિદાય અપાઇ
ખાસ-ખબર ન્યૂઝ વેરાવળ

વેરાવળના વતની વિશાલકુમાર સુરેન્દ્રભાઈ ગોંડ રજા લઈને વતન આવેલ અને ગઈકાલે કામકાજ અર્થે માળીયાહાટીના ચરખડી ગામ નજીક બાઈક ઉપર જઈ રહેલા ત્યારે સ્પીડ બ્રેકર ઓળંગવા જતા અકસ્માત સર્જાયો હતો. અકસ્માત થતા રોડ પર ટ્રાફિકજામના દૃશ્યો સર્જાયા હતા. બાદમાં ઈજાગ્રસ્ત થયેલા ત્રણેય બાઈક સવારોને હોસ્પિટલ ખસેડવામાં આવ્યા હતા. જ્યાં જેમાં વાયુદળના જવાનનું ગંભીર ઈજાના થવાના કારણે મૃત્યુ નિપજયાનું તબીબોએ જાહેર કર્યું હતું. મૃતક જવાન વિશાલકુમાર છેલ્લા ચાર વર્ષથી જેસલમેર ખાતે એરફોર્સમાં ફરજ બજાવતા હતા અને રજાના દિવસોમાં પોતાના વતન આવ્યા હતા. દરમિયાન અકસ્માતમાં મૃત્યુ પામતા પરિવારજનોમાં ગમગીની પ્રસરી હતી.

આ અકસ્માત અંગે પોલીસે ગુનો નોંધી તપાસ હાથ ધરી છે. દરમિયાન જવાનનો મૃતદેહ વતન વેરાવળ લઈ આવવામાં આવ્યો હતો. આજે અત્રે આવેલા વાયુદળના અધિકારીઓ અને સાથી જવાનોએ મૃતક જવાન વિશાલને ત્રિરંગા તેમજ ગાર્ડ ઓફ ઓનર સાથે અંતિમ વિદાય આપી હતી. આ સમયે ઉપસ્થિત સૌની આંખોમાંથી અશ્રુ વહેતા થઈ ગયા હતા.