મોરબીમાં વેચાણ સહ પ્રદર્શન માટેના જન્માષ્ટમી મેળાને ખુલ્લો મુકાયો

એલ. ઈ. કોલેજના ક્રિકેટ મેદાનમાં જિલ્લા પંચાયત પ્રમુખ અને કલેક્ટર દ્વારા મેળાનો શુભારંભ કરાવાયો

ખાસ-ખબર સંવાદદાતા
મોરબીના એલ.ઈ. કોલેજ ગ્રાઉન્ડ ખાતે જન્માષ્ટમી મેળાને જિલ્લા પંચાયત પ્રમુખ ચંદુભાઈ શિહોરા તેમજ જિલ્લા કલેકટર જી. ટી. પંડ્યાએ રીબીન કાપીને તેમજ દીપ પ્રાગટ્ય કરીને ખુલ્લો મૂક્યો હતો.

મહિલા અને બાળ વિકાસ વિભાગ હેઠળના તાબા હેઠળનું ગુજરાત મહિલા આર્થિક વિકાસ નિગમ લી. મહિલાઓનાં સશક્તિકરણ માટે કાર્યરત છે જે અંતર્ગત મહિલા હસ્તકલા કારીગરો દ્વારા ઉત્પાદિત અને નિર્મિત ચીજવસ્તુઓ જેવી કે, રોજ બરોજના વપરાશમાં ઉપયોગી તેમજ ઘર સુશોભનની ઉત્કૃષ્ટ ચીજવસ્તુઓ તથા અવનવી વસ્તુઓના વેચાણ અર્થે જન્માષ્ટમી મેળો-2023 મેળાનું આયોજન તા. 05/09/2023 થી તા. 14/09/2023 સુધી એલ.ઈ. કોલેજ મેદાન, મોરબી ખાતે કરવામાં આવ્યું છે. આ મેળામાં 60 મહિલા કારીગરોના સ્ટોલ ઉભા કરવામાં આવ્યા છે. આ મેળામાં અવનવી હસ્તકલા કારીગરીની અનેક ચીજવસ્તોઓના પ્રદર્શન સહ વેચાણનું આયોજન કરવામાં આવ્યું છે. આ મેળાના શુભારંભ પ્રસંગે જિલ્લા પંચાયત પ્રમુખ અને જિલ્લા કલેકટર સાથે જિલ્લા પંચાયત સહિતના અધિકારીઓ અને પદાધિકારીઓ ઉપસ્થિત રહ્યા હતા.