મહિલાઓને દુ:ખાવો બંધ કરવા માલીશ કરતો, પરીક્ષા પાસ કરવાની બોલપેન આપતો ભુવો ઝડપાયો
ખાસ-ખબર ન્યૂઝ રાજકોટ
- Advertisement -
છોટા ઉદેપુર જિલ્લાના પાવી જેતપુર તાલુકાના સટુન ગામની સીમમાં છેલ્લા 20 વર્ષથી દોરા-ધાગા, ઉતારવિધિ, પરીક્ષામાં પાસ કરવાની બોલપેન, મહિલાઓને દુ:ખાવો બંધ કરવા માલીશ કરતો ભુવો ગણપત નાથુભાઈ નાયકાની કપટલીલાનો ભાંડાફોડ ભારત જન વિજ્ઞાન જાથાની ટીમે કદવાલ પોલીસ સ્ટેશનની મદદથી 1265 મો સફળ પર્દાફાશ કર્યો હતો. ભુવાએ ધતિંગલીલા કાયમી બંધ કરવાની જાહેરાત કરી હતી. ભુવાની પોલીસે અટકાયત કરી હતી. આદિવાસી વિસ્તારમાં ભુવાઓનું સામ્રાજયનો અંત લાવવા જાથાએ નિર્ણય કર્યો છે.
બનાવની વિગત પ્રમાણે કદવાલ પોલીસ સ્ટેશન વિસ્તારમાં આવેલ સટુન ગામની સીમમાં માતાજી-ગુરુ સાહેબનું ધાર્મિક સ્થાન બનાવી ભુવો ગણપત નાથુ છેલ્લા વીસ વર્ષથી દોરા-ધાગા, ઉતારવિધિ, પ્રેમી યુગલ પરીક્ષામાં પાસ કરવાની બોલપેનનું વેંચાણ, મહિલાઓના દુ:ખાવા બંધ કરવા માલીશ કરવી, તંત્ર-મંત્રના નામે લોકોની સાથે શારીરિક, માનસિક આર્થિક છેતરપિંડી કરતો હોવાની માહિતી આપવામાં આવી હતી. સ્થાનિક લોકોએ મહિલાને માલીશ કરતો વિડિયો, બોલપેનથી પાસ વિગેરે આધાર પુરાવા જાથાના કાર્યાલયે મોકલવામાં આવ્યા હતા. કબીરપંથી ભુવો આદીવાસી પ્રજાને છેતરે છે તે સંબંધી વાત મુકવામાં આવી હતી. ભુવાના પિતા પણ દુ:ખ દર્દ મટાડવાનું કામ કરતા હતા. કાળા દોરા બાંધવા, શ્રીફળ, ચોખા, પ્રસાદી કરવી વિગેરે વિધિ-વિધાનના નામે રૂપિયા પડાવે છે તે મતલબની હકિકત મુકવામાં આવી હતી. ભોળી પ્રજા દુ:ખી હોવાના કારણે ભુવાથી છેતરાય છે. ભુવાના પર્દાફાશ સંબંધી રજુઆત સાથે માહિતી આપી હતી. ટેલીફોનિક-રૂબરૂ કાર્યાલયે પુરાવા આપ્યા હતા.
જાથાના જયંત પંડયાએ માહિતીના આધારે સદસ્યા ભાનુબેન ગોહિલ, રવિ પરબતાણીને મોકલી ખરાઈ કરતાં સત્ય હકિકત સામે આવી હતી. રાજયના મુખ્યમંત્રી, ડી.જી.પી., ગૃહ મંત્રાલય, વડોદરા રેન્જ આઈ.જી.પી., એસ.પી. છોટા ઉદેપુરને પત્ર પાઠવી સટુન ગામના પર્દાફાશ માટે પોલીસ બંદોબસ્તની માંગણી કરવામાં આવી હતી. જિલ્લા પોલીસ વડાએ કદવાલ પોલીસ સ્ટેશનને જરૂરી સુચના મોકલી દીધી હતી. રાજકોટથી જાથાની ટીમ પહોંચી હતી. જાથાની ટીમ અને પોલીસ કાફલો ભુવા ગણપતના ઘરે પહોંચી ગયા ત્યારે મહિલાના પગમાં માલીશ કરતા હતા. ભુવા રંગે હાથે ઝડપાઈ ગયો અને દલીલો બાદ ભુવો ભાંગી પડયો હતો. તેમણે ધતિંગ કાયમી બંધની જાહેરાત કરી દીધી હતી. ભુવાના કરતૂતો બંધ કરાવતા ગામ લોકોએ રાજીપો વ્યક્ત કર્યો હતો.
ત્યાર બાદ કદવાલ પોલીસ સ્ટેશનને જાથાએ પત્ર આપતા ભુવાની અટકાયત કરવામાં આવી હતી. સટુન ગામના ભુવાના સમર્થકો પોલીસ સ્ટેશને પહોંચી ગયા હતા. જાથાની કામગીરીથી પરિચિત હોય લાગણી બતાવી હતી. આદિવાસી વિસ્તારમાં ભુવાઓનું સામ્રાજય હોય કાયમી બંધ કરાવવા આ વિસ્તારમાં વધુ કામગીરી કરવા લાગણી બતાવી હતી. જાથાએ હકારાત્મક વલણ બતાવ્યું હતું. વિજ્ઞાન જાથાનો 1265 મો સફળ પર્દાફાશમાં વડોદરા રેન્જ આઈ.જી.પી., એસ.પી. છોટા ઉદેપુર, એલ.આઈ.બી. જિલ્લા કંટ્રોલ, કદવાલ પોલીસ સ્ટેશનનો વિશેષ આભાર માન્યો હતો. રાજયમાં ધતિંગ કરનારથી છેતરાયેલા, ભોગ બનેલાએ મો. 98252 16689 ઉપર સંપર્ક કરવા યાદીમાં જણાવાયું છે.
