શક્તિ પ્રતીક મનાતું પક્ષી બાલ્ડ ઈગલ હવે અમેરિકાનું રાષ્ટ્રીય પક્ષી પણ બન્યું

240 વર્ષથી આ પક્ષી અમેરિકામાં શક્તિનું પ્રતીક મનાતું હતું, હવે રાષ્ટ્રીય પક્ષીનો દરજજો મળ્યો

છેલ્લાં 240 વર્ષથી અમેરિકામાં શક્તિના પ્રતીક મનાતા શક્તિશાળી પક્ષી બાલ્ડ ઈગલને મંગળવારે રાષ્ટ્રીય પક્ષી જાહેર કરવામાં આવ્યું છે. કોંગ્રેસે મોકલેલા આશરે પચાસ જેટલા વિધેયકો પર વર્તમાન પ્રેસીડન્ટ જો બાઈડને ક્રિસમસ પહેલાં મંગળવારે હસ્તાક્ષર કર્યા હોવાથી બાલ્ડ ઈગલને અમેરિકાના રાષ્ટ્રીય પક્ષી તરીકે માન્યતા મળી છે.

એવું માનવામાં આવે છે કે, દશકોથી શક્તિના પ્રતીક મનાતા સફેદ માથું, પીળી ચાંચ અને ભૂરો રંગ ધરાવતા આ પક્ષીને લાંબી પ્રતીક્ષા પછી અપેક્ષિત સન્માન મળ્યું છે. આ પક્ષીને 1782થી અમેરિકાના સતાવાર પ્રતીક તરીકેનું સ્થાન મળ્યું હતું, પણ એ સતાવાર રીતે રાષ્ટ્રીય પક્ષી નહોતું.