14 વર્ષીય સગીર છાત્રને રૂમમાં લઈ જઈ કર્યું સૃષ્ટિ વિરુદ્ધનું કૃત્ય

જસદણની જીવનશાળા હોસ્ટેલના ગૃહપતિ તેમજ આચાર્ય સામે ફરિયાદ

પોક્સો સહિતની કલમો હેઠળ ગુનો નોંધી બંનેને ઝડપી પાડવા જસદણ પોલીસની દોડધામ

ખાસ-ખબર ન્યૂઝ રાજકોટ

રાજકોટ જિલ્લામાં શિક્ષણ જગતને શર્મસાર કરતી વધુ એક ઘટના સામે આવી છે જસદણના આંબરડી ખાતે આવેલી જીવનશાળા હોસ્ટેલના ગૃહપતિ તેમજ આચાર્યએ સગીર સાથે સૃષ્ટિ વિરુદ્ધનું કૃત્ય આચર્યુ હોવાની ફરિયાદ નોંધાઈ છે ભોગ બનનારે આચાર્યને રજૂઆત કરી હતી. ત્યારે ગૃહપતિને અટકાવવાને બદલે આચાર્ય રત્ના રાઘવાણી પણ આ કુકર્મમાં સામેલ થઈ ગયો હતો. જોકે સગીરે પોતાના પરિવારને જાણ કરતા મામલો પોલીસ મથકે પહોંચ્યો છે. જસદણ પોલીસે પોક્સો સહિતની કલમો હેઠળ ગુનો નોંધી બંનેને ઝડપી પાડવા તપાસ હાથ ધરી છે.

પ્રાપ્ત વિગત મુજબ જસદણ તાલુકાના આંબરડીમાં જીવનશાળા હોસ્ટેલ આવેલી છે. જેના ગૃહપતિ કિશન ગાંગળિયા અને આચાર્ય રત્ના રાઘવાણી સામે ભોગ બનનાર સગીરે નોંધાવેલી ફરિયાદમાં જણાવ્યું હતું કે, ગૃહપતિ દ્વારા તેને જર્જરિત બની ગયેલા એક રૂમમાં લઈ જવામાં આવતો હતો. જ્યાં નગ્ન કરીને તેની સાથે સૃષ્ટિ વિરુદ્ધનું કૃત્ય આચરવામાં આવ્યું હતું. જેને લઇને પોતે આ અંગે આચાર્યને રજૂઆત કરી હતી. પરંતુ આ નરાધમ આચાર્ય ગૃહપતિ સામે પગલાં લેવાના બદલે પોતે પણ કામલીલામાં સામેલ થઈ ગયો હતો. જેને લઈ મોકો મળતા પોતે આ અંગે વાલીને રજૂઆત કરી હતી. અને હોસ્ટેલમાંથી પરત લઈ જવા જણાવ્યું હતું. તેમજ પોતાની સાથે બનેલી ઘટના વર્ણવી હતી. હાલ જસદણ પોલીસે પોક્સો સહિતની કલમો હેઠળ ગુનો નોંધી બંને આરોપીઓને ઝડપી લેવા તપાસ હાથ ધરી છે ભોગ બનનારના વાલીએ જણાવ્યું કે હોસ્ટેલમાં 5-6 વિદ્યાર્થીઓને અલગ સુવડાવે છે. ત્યાં તેમના ગૃહપતિ કિશનભાઈ ગાંગળિયા રાત્રે 10 વાગ્યા પછી પોતાના રૂમમાં લઈ જઇને સેક્સ્યુઅલ હેરેસ્ટમેન્ટ કરે છે. 6 વિદ્યાર્થીઓને અલગથી જર્જરિત હોસ્ટેલમાં જ સુવડાવે છે. આ સાથે જબરદસ્તી પાન-મસાલા ખવડાવે છે. જો ઈન્કાર કરે તો વિદ્યાર્થીઓને માર મારવામાં આવે છે.