રસ્તાઓની હાલત એટલી ખરાબ છે કે તેના પર ચાલવું પણ મુશ્કેલ
ખાસ-ખબર ન્યૂઝ રાજકોટ
રાજકોટ શહેરના વોર્ડ નંબર 11ના રહેવાસીઓ દ્વારા પોતાના વિસ્તારના ખરાબ રોડ-રસ્તાઓ અંગે રાજકોટ મહાનગરપાલિકા તંત્ર સામે એક અનોખો વિરોધ પ્રદર્શન કરવામાં આવ્યું હતું. સ્થાનિકોએ થાળી વગાડી અને રોડની પૂજા-પ્રાર્થના કરીને તંત્રની નિષ્ક્રિયતા સામે પોતાનો રોષ વ્યક્ત કર્યો હતો. સ્થાનિક નરેશ પરસાણાએ મહાનગરપાલિકાને ઈજનેરને નવા રસ્તા બનાવવા માટે રજૂઆત કરી છે. સ્થાનિકોએ ખરાબ અને ખાડાવાળા રસ્તાઓ પર ભેગા થઈને વિરોધ નોંધાવ્યો હતો. તેમણે થાળીઓ વગાડીને ધ્યાન દોરવાનો પ્રયાસ કર્યો કે રસ્તાઓની હાલત એટલી ખરાબ છે કે તેના પર ચાલવું પણ મુશ્કેલ બન્યું છે. આ ઉપરાંત, તેમણે રોડની પૂજા-પ્રાર્થના પણ કરી હતી, જેનો મુખ્ય હેતુ એ હતો કે જાણે તેઓ દેવતાની જેમ રસ્તાઓની દયનીય સ્થિતિ સુધારવા માટે તંત્રને આજીજી કરી રહ્યા હોય. આ પ્રતીકાત્મક વિરોધ દ્વારા સ્થાનિકોએ તંત્ર પર તાત્કાલિક પગલાં લેવા માટે દબાણ લાવવાનો પ્રયાસ કર્યો હતો.
- Advertisement -
વોર્ડ નંબર 11ના રહેવાસીઓ છેલ્લા ઘણા સમયથી ખરાબ રસ્તાઓને કારણે પરેશાની ભોગવી રહ્યા છે. ચોમાસામાં આ ખાડાવાળા રસ્તાઓ વધુ જોખમી બની જાય છે, જેના કારણે અકસ્માતનો ભય રહે છે. આ અનોખા વિરોધ પ્રદર્શન દ્વારા તેમણે રાજકોટ મનપા તંત્રને તાત્કાલિક રસ્તાઓના સમારકામ અને નવીનીકરણની માંગ કરી છે, જેથી સ્થાનિકોને પડતી હાલાકીનો અંત આવે.
