મથુરા કૃષ્ણભૂમિ કેસનાં હિન્દુ પક્ષનાં વકીલને પાકિસ્તાન તરફથી ધમકીભર્યો ફોન આવ્યા

ફોનમાં કેસમાંથી ખસી જવા માટે કહેવામાં આવ્યું

મથુરાના શ્રી કૃષ્ણ જન્મભૂમિ કેસમાં હિન્દુ પક્ષના વકીલ આશુતોષ પાંડેને પાકિસ્તાન તરફથી ધમકીભર્યો ફોન આવ્યો છે. તેઓ વૃંદાવનથી હાઈકોર્ટમાં હાજરી આપવા જઈ રહ્યા હતા. આ દરમિયાન તેમને ફોન પર કેસમાંથી ખસી જવા માટે કહેવામાં આવ્યું હતું.

જો કેસ પાછો નહીં ખેંચાય તો જાનથી મારી નાખવાની ધમકી આપવામાં આવી છે. તેમણે આ અંગે પોલીસને જાણ કરી છે. પોલીસ આ મામલે તપાસ કરી રહી છે. મહત્ત્વનું છે કે શ્રી કૃષ્ણ જન્મસ્થળ સાથે જોડાયેલા મામલાની આજે હાઈકોર્ટમાં સુનાવણી થવાની છે.

આશુતોષ પાંડે જ્યારે વૃંદાવનથી હાઈકોર્ટ જવા નીકળ્યા હતા ત્યારે તેમને ધમકીભર્યો ફોન આવ્યો હતો. આ દરમિયાન તેમને વોટ્સએપ પર કોલ આવ્યો. દાવો કરવામાં આવી રહ્યો છે કે તેને પાકિસ્તાનથી ફોન આવ્યો હતો. મામલાની માહિતી મળતા જ પોલીસ ચોંકી ઉઠી હતી. આ પહેલા ફેબ્રુઆરીમાં પણ તેમને પાકિસ્તાન તરફથી ધમકીભર્યો ફોન આવ્યો હતો. આ અંગે તેણે ફરિયાદ પણ નોંધાવી હતી.