મોરબીની ત્રણેય બેઠક પર 5400 કર્મચારીઓ ચૂંટણી ફરજ પર તૈનાત રહેશે

સમગ્ર મતદાન પ્રક્રિયા અંગે કર્મચારીઓને સઘન તાલીમ અપાઈ

ખાસ-ખબર સંવાદદાતા
મોરબી જીલ્લાની ત્રણેય વિધાનસભા બેઠકો પર નિષ્પક્ષ અને તટસ્થતાથી ચૂંટણી પ્રક્રિયા કરવા માટે ચૂંટણી તંત્ર દ્વારા ચૂંટણીની કામગીરીને વેગ અપાઇ રહ્યો છે. મોરબી જીલ્લાની ત્રણેય વિધાનસભા બેઠકના કુલ 905 બુથ પર અંદાજીત 5400 જેટલા કર્મચારીઓ ફરજ બજાવશે.

તમામ કર્મચારીઓ પોતાની કામગીરી યોગ્ય રીતે કરે તે માટે જીલ્લા ચૂંટણી વિભાગ દ્વારા તમામ કર્મચારીઓને તાલીમ આપવામાં આવી હતી જેમાં મોરબીમાં વિધાનસભાની ચૂંટણી કાર્ય સંભાળનાર પોલિંગ સ્ટાફ, સખી મતદાન મથકોના મહિલા સ્ટાફ સહિતનાને ઇવીએમ અને વીવીપેટની મતદાન પ્રક્રિયા અંગે માહિતી આપવામાં આવી હતી.

વિધાનસભાની બેઠકો માટે આગામી તા. 1 ડિસેમ્બરના રોજ પ્રથમ તબક્કાનું મતદાન થનાર છે. મોરબી, માળીયા ઉપરાંત ટંકારા, પડધરી અને વાંકાનેર, કુવાડવા બેઠક મળી કુલ 905 બુથ પર મતદાન થશે. આ માટે ચૂંટણી તંત્ર દ્વારા તમામ તૈયારીઓ કરવામાં આવી રહી છે. મતદાન મથકો ઉપર મતદાન કામગીરી કરનાર પોલિંગ સ્ટાફ માટે તાલીમનું આયોજન કરવામાં આવ્યું હતું જેમાં જિલ્લામાં ત્રણ જુદી જુદી જગ્યાએ યોજાયેલા તાલીમ વર્ગોમાં મતદાર યાદી, ઇવીએમ, વીવીપેટ, બી.યુ સી.યુ. સહિતના પર મતદાન કેવી રીતે કરાવવું તેની સંપુર્ણપણે માહિતી આપી ફરજ પરના સ્ટાફની કામગીરી સમજાવવામાં આવી હતી. સખી મતદાન મથકોના મહિલા સ્ટાફને પણ આ કામગીરીની તાલીમ આપવામાં આવી હતી.