અમદાવાદ-કચ્છ હાઈવે પર અકસ્માતમાં 4નાં મોત

લગ્નપ્રસંગ પતાવી ઘરે જઈ રહેલા યુવકોની કાર પલટી મારી આઈસર સાથે અથડાઈ, એન્જિન બહાર નીકળીને 20 ફૂટ દૂર ફંગોળાયું

ખાસ-ખબર સંવાદદાતા
અમદાવાદ-કચ્છ હાઈવે ઉપર ધ્રાંગધ્રા બાયપાસ પાસે આજે ગમખ્વાર અકસ્માતની ઘટના સામે આવી છે. લગ્નપ્રસંગ પતાવી ઘરે જઈ રહેલા હળવદના યુવકોની સ્વિફ્ટ કાર પલટી મારી ડિવાઈડર કુદાવી સામેની સાઈડ ઉપર જઈ રહેલા આઈસર સાથે અથડાઈ હતી. જેથી ચાર યુવકોનાં મોત થયાં છે. તેમજ 2 યુવકોને ગંભીર ઈજા પહોંચી હતી. આ અકસ્માત એટલો ભયંકર હતો કે, કારનું એન્જિન બહાર નીકળીને 20 ફૂટ દૂર ફંગોળાઈ ગયું હતું.
આ અકસ્માત અંગે જાણવા મળતી વિગતો મુજબ હળવદ તાલુકાના ગોલાસણ ગામના છ યુવાનો ધ્રાંગધ્રા તાલુકાના નરાડી ગામે લગ્નપ્રસંગમાં ગયા હતા. જ્યાંથી રાત્રીના જમવા માટે હોટલમાં ગયા ત્યાંથી પરત હળવદ પોતાના ઘરે આવી રહ્યા હતા. ત્યારે ચાલકે સ્ટીયરિંગ પરથી કાબૂ ગુમાવતા કાર ડિવાઈડર કૂદીને સામેની સાઈડમાં આવી રહેલી આઈસર સાથે અથડાતાં કારમાં બેઠેલા છ પૈકી ચાર યુવાનોનાં મોત થયાં હતાં. અકસ્માત એટલો ભયંકર હતો કે કારનું એન્જિન બહાર નીકળીને 20 ફૂટ દૂર ફંગોળાઈ ગયું હતું.

મૃતકનાં નામ
કરશન ઠાકોર
કિરણ ઠાકોર
કાના ભૂપતભાઈ ઠાકોર
ઉમેશ ઠાકોર

ઈજાગ્રસ્તનાં નામ

અમિત ઠાકોર
કાના રાયધનભાઈ ઠાકોર