એક વર્ષમાં સ્ટોક માર્કેટમાં ગુજરાતમાં રોકાણકારોની સંખ્યામાં 25.53 લાખનો વધારો

ગુજરાતના રોકાણકારોની ઈન્વેસ્ટમેન્ટ વેલ્યૂ 12,28,590 કરોડ રૂ. વધી

ગુજરાતી ઈન્વેસ્ટર 2023માં સરેરાશ 827495 રૂ. કમાયો
ખાસ-ખબર સંવાદદાતા
ભારતીય શેરબજારો માટે 2023નું વર્ષ ઘણું જ ફાયદાકારક સાબિત થયું છે. ગુજરાત સહિત દેશભરમાંથી આઈપીઓ, સેક્ધડરી માર્કેટ અને મ્યુચ્યુઅલ ફ્ંડ મારફત બહોળા પ્રમાણમાં રોકાણ આવ્યું છે. જેના કારણે માર્કેટમાં એફઆઈઆઈની વેચવાલી હોવા છતાં બજારમાં સુધારો ટકી ગયો હતો. નાના મોટા સૌ રોકાણકારોને શેરબજારની તેજીનો લાભ મળતા ઇન્વેસ્ટર્સના રોકાણ મૂલ્યમાં નોંધપાત્ર વધારો જોવા મળ્યો હતો.
આંકડા પર નજર કરીએ તો બોમ્બે સ્ટોક એક્સચેન્જનું માર્કેટ કેપિટલાઈઝેશન 29% વધીને રૂ. 364.28 લાખ કરોડ (રૂ. 3,64,28,846 કરોડ) પહોંચી ગયું છે. કેલેન્ડર વર્ષ 2022ની સરખામણીએ માર્કેટ કેપમાં રૂ. 81.90 લાખ કરોડનો વધારો થયો છે. બીએસઈના આંકડાનું કમ્પાઇલેશન કરતા સામે આવ્યું કે, ગુજરાતના રોકાણકારોની ઇન્વેસ્ટમેન્ટ વેલ્યુમાં રૂ. 12.28 લાખ કરોડ (રૂ. 12,28,590 કરોડ)નો વધારો થયો છે. ગુજરાતમાં આશરે 1.48 કરોડ રોકાણકારો છે અને આ હિસાબે વર્ષ 2023 દરમિયાન રાજ્યનો દરેક રોકાણકાર શેરબજારમાંથી રૂ. 827495 કમાયો હતો.
બજારના નિષ્ણાતો માને છે કે, પહેલાની તુલનામાં રોકાણકારોમાં પેનિક સેલિંગ ઓછુ રહે છે. રીટેલ ઇન્વેસ્ટર્સ હવે સમજતા થયા છે કે સારું વળતર જોઈતું હોય તો પોઝીશન હોલ્ડ કરાવી જોઈએ અને તેના પરિણામે જ માર્કેટ કેપ અને ઇન્વેસ્ટમેન્ટ વેલ્યુમાં વધારો જોવા મળી રહ્યો છે. 2023નું વર્ષ એ 2017 પછી સૌથી ઊંચું રીટર્ન આપનારું વર્ષ રહ્યું છે. ગત વર્ષ દરમિયાન મેન્યુફેક્ચરિંગ, કેમિકલ્સ, ડીફેન્સ, ઓટો અને પબ્લિક સેક્ટર કંપનીઓમાં સારું રોકાણ જોવા મળ્યું હતું.

ઈન્વેસ્ટર્સની સંખ્યાના મામલે ગુજરાત દેશમાં બીજા ક્રમે
બોમ્બે સ્ટોક એક્સચેન્જના રજિસ્ટર્ડ ઇન્વેસ્ટર્સના ફિગર્સ જોઈએ તો 2023 દરમિયાન ગુજરાતમાંથી રોકાણકારોની સંખ્યામાં 20.77%નો વધારો થયો છે. 31 ડિસેમ્બર 2023ના અંતે ગુજરાતમાં 1.48 કરોડથી વધુ રોકાણકારો (1,48,47,100 રોકાણકારો) નોંધાયા હતા. આ વર્ષમાં રોકાણકારોની સંખ્યામાં 25.23 લાખનો ઉમેરો થયો છે. ઇન્વેસ્ટર્સની સંખ્યાના મામલે ગુજરાત દેશભરમાં બીજા ક્રમે છે. 2.97 કરોડ રોકાણકાર સાથે મહારાષ્ટ્ર પહેલા નંબર પર છે. ભારતમાં કુલ 15.48 કરોડ રોકાણકારો છે.