1500થી 1700 બહેનો જિલ્લા પંચાયત કચેરી ખાતે એકઠા થયા
સમગ્ર ગુજરાતમાં સરકારી કર્મચારી પોતાના પ્રશ્નોને લઇ સરકાર સમક્ષ માગણી કરી રહ્યા છે. ત્યારે રાજકોટમાં 1500 જેટલી આંગણવાડી કાર્યકર બહેનો અને તેડાધર બહેનો પણ પોતાની માગણીઓ લઈને જિલ્લા પંચાયત કચેરી ખાતે પડતર પ્રશ્ને સરકાર વિરોધી સૂત્રોચ્ચાર અને ધરણા કર્યા હતા. અને સરકાર પર આક્ષેપ મુકતા કહ્યું હતું કે,’સરકાર જ મહિલાઓનું શોષણ કરે છે’
- Advertisement -
આ મામલે ગુજરાત આંગણવાડી કર્મચારી સંગઠનનાં રાજકોટ જિલ્લા પ્રમુખ સંગીતાબેને જણાવ્યું હતું કે, આજે અમારા સંગઠનનાં નેજા હેઠળ સમગ્ર રાજકોટ જિલ્લાનાં 9 તાલુકાનાં બહેનો હડતાળ ઉપર ઉતર્યા છીએ. આજે અમે 1500થી 1700 બહેનો જિલ્લા પંચાયત કચેરી ખાતે એકઠા થયા છીએ. અને અમારી મુખ્ય માંગ છે કે, માનદ વેતનમાંથી લઘુતમ વેતનમાં અમારો સમાવેશ કરવામાં આવે. હાલ કારમી મોંઘવારી છતાં વર્કર બહેનોને માત્ર 7,800 અને હેલ્પર બહેનોને માત્ર 3,950 ચુકવવમાં આવે છે.
વધુમાં તેમણે કહ્યું હતું કે, ખરેખર સરકારે સમજવું જોઈએ કે 3,950માં બહેનો એક તેલનો ડબ્બો અને એક ગેસનો બાટલો જ લઈ શકે. આ મોંઘવારી વચ્ચે આટલા ઓછા વેતનમાં બહેનો પોતાનું ઘર કઈ રીતે ચલાવી શકે ? તો જે પ્રમાણેની કામગીરી સોંપાય છે તે પ્રમાણે વેતન પણ સરકારે ચૂકવી લઘુતમ વેતનમાં જ અમારો સમાવેશ કરવો જોઈએ. આ ઉપરાંત સુપ્રીમ કોર્ટનાં ચુકાદા મુજબ ગ્રેચ્યુઇટી ચૂકવવાનું જણાવી ગુજરાત સરકાર મહિલા સશક્તિકરણની વાતો કરી મહિલાઓનું શોષણ કરતી હોવાનો આરોપ પણ તેમણે લગાવ્યો છે.
ઉલ્લેખનીય છે કે, વિધાનસભાની ચૂંટણીઓ નજીક આવતા જ કર્મચારીઓ દ્વારા વિરોધ પ્રદર્શન કરવામાં આવી રહ્યા છે. જેમાં શિક્ષકો તેમજ અન્ય સરકારી કર્મચારીઓ દ્વારા જૂની પેંશન યોજના લાગુ કરવાની માંગ સાથે વિરોધ કરવામાં આવી રહ્યો છે. ત્યારે હવે આંગણવાડી અને આશાવર્કર બહેનોએ પણ મોરચો માંડતા સરકારની મુશ્કેલીઓ વધી રહી છે. ત્યારે હવે આંગણવાડી અને આશાવર્કર બહેનોની માંગને લઈ સરકાર ક્યારે અને શું નિર્ણય લેશે તે જોવું રહ્યું.
