હરણાસા ગામ સમૂહ લગ્નમાં 11 નવદંપતીઓએ પ્રભુતામાં પગલાં પાડ્યા

સામાજિક જીવનમાં લગ્ન એ આવશ્યક પરંપરા છે. લગ્નથી બે પરિવારો એક થતા હોય છે. 21મી સદીમાં એક તરફ લોકો લગ્નમાં ધૂમ ખર્ચો કરીને પોતાનો રૂઆબ દેખાડાવાના પ્રયાસમાં લાખો-કરોડો રૂપિયાના આંધણ કરતા હોય છે. તો બીજી તરફ ગુજરાતમાં અનેક સમાજ જાગૃત બન્યા છે અને સમગ્ર સમાજ એકત્ર થઇ એક માંડવે સમૂહ લગ્નનું આયોજન કરતા થયા છે. આવા જ એક સમૂહ લગ્ન સુત્રાપાડાના હરણાસા ગામે આહિર સમાજ દ્વારા કરવામાં આવ્યું હતું. આ સમૂહ લગ્નમાં ગામની 11 દીકરીઓના લગ્ન એક જ માંડવા નીચે કરવામાં આવ્યા હતા. હરણાસા આહીર સમાજ દ્વારા કરવામાં આવેલી આ પહેલને અન્ય સમાજના લોકો દ્વારા વધાવી લેવામાં આવી છે. સમૂહ લગ્નના આયોજનમાં સમગ્ર ગામના લોકોએ ઉત્સાહપૂર્વક યથાશક્તિ ભાગીદારી નોંધાવી આ પ્રસંગને દિપાવ્યો હતો. આ સમૂહ લગ્નની ખાસ વિશેષતા એ રહી હતી કે, કોઇ પણ પ્રકારની ભવ્યતા વિના એકદમ સાદાઇથી લગ્ન સમારોહ યોજવામાં આવ્યો. કોઇપણ ભેદભાવ વિના સમગ્ર ગામે એક પરિવારની જેમ પોતાના આંગણે આવેલા આ પ્રસંગને ઉજવ્યો હતો.આહીર સમાજ દ્વારા આયોજિત સમૂહ લગ્નમાં તાલાળાના ધારાસભ્ય ભગવાન બારડ સહિત આહીર સમાજના આગેવાનો ઉપસ્થિત રહ્યા હતા તેમજ સાદગી પૂર્ણ સમૂહ લગ્ન આયોજન સૌ માટે આયોજન પ્રેરણાદાયી બન્યું.