ભવનાથ મહાદેવ મંદિરમાં શ્રાવણમાં વિશેષ દર્શન સાથે પૂજન-અર્ચન

આજથી પવિત્ર શ્રાવણ માસનો પ્રારંભ: જૂનાગઢ ભવનાથ મંદિરે ભક્તિનો માહોલ

પ્રથમ દિવસે શિવમંદિરો હર હર મહાદેવના નાદથી ગુંજ્યા
ભોળાનાથના વિશેષ શૃંગાર દર્શનનો લાભ લેવા ભક્તો ઉમટ્યા

ખાસ-ખબર ન્યૂઝ જૂનાગઢ, તા.25
હિન્દુ ધર્મમાં અત્યંત પવિત્ર અને આસ્થાના પ્રતિક સમા શ્રાવણ માસનો આજથી શુભારંભ થઈ ગયો છે. શિવભક્તોમાં આ મહિનાને ભગવાન શિવની કૃપા પ્રાપ્ત કરવા માટે શ્રેષ્ઠ માનવામાં આવે છે. શ્રાવણ માસના પ્રથમ દિવસે જ વહેલી સવારથી જૂનાગઢના શિવાલયોમાં ભક્તોની ભીડ ઉમટી પડી હતી. ભોળાનાથને વિશેષ શૃંગાર અને પૂજન-અર્ચન સાથે શિવભક્તો ધન્યતા અનુભવી રહ્યા છે. શ્રાવણ મહિનો ભગવાન શિવને સમર્પિત છે. એવી માન્યતા છે કે આ માસમાં ભગવાન શિવ સૃષ્ટિનું સંચાલન કરે છે. આ મહિનામાં સોમવારનું વિશેષ મહત્વ છે, જેને ’શ્રાવણી સોમવાર’ કહેવાય છે. શ્રાવણ માસમાં શિવલિંગ પર જળ, દૂધ, બિલિપત્ર, ધતૂરો, ભાંગ, ચંદન વગેરે અર્પણ કરીને ભક્તો ભગવાન શિવને પ્રસન્ન કરવાનો પ્રયાસ કરે છે. ઘણા ભક્તો ઉપવાસ રાખીને શિવમહિમ્ન સ્તોત્ર, શિવ તાંડવ સ્તોત્ર અને મહામૃત્યુંજય મંત્રનો જાપ કરે છે. અપરિણીત ક્ધયાઓ સારા વરની પ્રાપ્તિ માટે શ્રાવણી સોમવારના વ્રત રાખે છે, જ્યારે સુહાગન મહિલાઓ પોતાના પતિના લાંબા આયુષ્ય અને સુખી દામ્પત્ય જીવન માટે પ્રાર્થના કરે છે. જૂનાગઢ શહેર અને ગિરનાર પર્વત પર આવેલા શિવાલયોમાં શ્રાવણના પ્રથમ દિવસે ભક્તિમય માહોલ જોવા મળ્યો છે. વહેલી સવારથી જ શિવ મંદિરો ’બમ બમ ભોલે’ અને ’હર હર મહાદેવ’ ના નાદથી ગુંજી ઉઠ્યા છે. શહેરના મુખ્ય શિવ મંદિરો જેમ કે ભવનાથ મહાદેવ મંદિર, દાતારેશ્વર મહાદેવ મંદિર, ગિરનારના વિવિધ શિવાલયો અને અન્ય નાના-મોટા મંદિરોમાં ભક્તોની લાંબી કતારો જોવા મળી રહી છે. ભક્તો શિવલિંગ પર જળાભિષેક, દુગ્ધાભિષેક અને રૂદ્રાભિષેક કરીને પુણ્ય કમાઈ રહ્યા છે. અનેક મંદિરોમાં શિવલિંગને વિવિધ ફૂલો, ભાંગ, ધતૂરા અને અન્ય પવિત્ર વસ્તુઓથી સુંદર રીતે શણગારવામાં આવ્યા છે. શ્રાવણ માસ દરમિયાન ભવનાથ મંદિરમાં વિશેષ પૂજા-અર્ચના, ભજન-કીર્તન અને ધાર્મિક કાર્યક્રમોનું આયોજન થાય છે. ભક્તો ગિરનારની યાત્રા કરીને પણ ભવનાથ મહાદેવના દર્શનનો લ્હાવો લે છે. આજથી શરૂ થયેલા શ્રાવણ માસના પ્રથમ દિવસે શિવાલયોમાં ભગવાન શિવને વિવિધ પ્રકારના શૃંગાર કરવામાં આવ્યા છે. ક્યાંક ફૂલોનો શૃંગાર તો ક્યાંક બરફના શિવલિંગ બનાવવામાં આવ્યા છે. દૂધ, દહીં, ઘી, મધ, સાકર અને ગંગાજળથી અભિષેક કરીને ભક્તો ભગવાન ભોળાનાથના દર્શન કરી રહ્યા છે. શિવલિંગ પર ચંદનનો લેપ, બિલિપત્ર અને ધતૂરાના ફૂલ અર્પણ કરીને ભક્તો પોતાની મનોકામના પૂર્ણ થાય તેવી પ્રાર્થના કરી રહ્યા છે.

જૂનાગઢના ભવનાથ મંદિરનો ઇતિહાસ અને મહત્વ
જૂનાગઢ શહેરથી થોડે દૂર, ગિરનાર પર્વતની તળેટીમાં આવેલું ભવનાથ મહાદેવ મંદિર ગુજરાતના સૌથી પ્રાચીન અને પવિત્ર શિવાલયોમાંનું એક છે. આ મંદિરનો ઇતિહાસ સદીઓ જૂનો છે અને તે અનેક ધાર્મિક કથાઓ અને રહસ્યો સાથે જોડાયેલો છે.પૌરાણિક કથાઓ અનુસાર, આ તે સ્થાન છે જ્યાં ભગવાન શિવ અને દેવી પાર્વતી ગિરનાર પર્વત પરથી પસાર થઈ રહ્યા હતા ત્યારે તેમના વસ્ત્રો મૃગી કુંડમાં પડી ગયા હતા. આથી, આજે પણ મહાશિવરાત્રીના પવિત્ર પર્વ પર નાગા બાવાઓ અને સાધુ-સંતો કુંડમાં સ્નાન કર્યા બાદ શિવજીની મહાપૂજા માટે મંદિરે જાય છે. ભવનાથ મહાદેવ મંદિર દર વર્ષે યોજાતા ભવ્ય મહાશિવરાત્રી મેળા માટે પ્રખ્યાત છે. આ મેળામાં દેશ-વિદેશથી લાખો ભક્તો અને નાગા સાધુઓ એકઠા થાય છે, જે અહીંની આધ્યાત્મિકતા અને પરંપરાની જીવંત ઝલક દર્શાવે છે. ભવનાથ મંદિર આસપાસ અનેક નાના-મોટા મંદિરો અને આશ્રમો આવેલા છે, જે સદીઓથી સાધુ-સંતો અને તપસ્વીઓ માટે આધ્યાત્મિક કેન્દ્ર રહ્યા છે. આ મંદિર શૈવ પરંપરાનું એક મહત્વનું ધામ છે. મંદિરનું સ્થાપત્ય પ્રાચીન શૈલીનું છે, જે તેની ઐતિહાસિકતા અને કલાત્મકતા દર્શાવે છે. અહીંની શાંત અને ભક્તિમય વાતાવરણ શ્રદ્ધાળુઓને આધ્યાત્મિક શાંતિનો અનુભવ કરાવે છે.