પ્રજા શક્તિ ડેમોક્રેટિક પાર્ટીના શંકરસિંહ વાઘેલા સાથે 22 એપ્રિલે કાર્યકર્તાનું સંમેલન: ભારે ઉત્કંઠા

વિસાવદર વિધાનસભામાં ચોપાંખીયો જંગ જામશે

ખાસ-ખબર ન્યૂઝ જૂનાગઢ, તા.21
વિસાવદર વિધાનસભાની ચૂંટણીની તૈયારીઓ ચૂંટણી પંચ જાહેર કરે તે પહેલા દરેક રાજકીય પક્ષોએ તૈયારીઓ શરૂ કરી દીધી હોય તેમ આપે તેના ઉમેદવાર તરીકે ગોપાલભાઈ ઇટાલીયાને જાહેર કરેલ છે અને કોંગ્રેસ પણ સ્વતંત્ર રીતે ચૂંટણી લડવા માગતી હોય તેઓના ઉમેદવાર તરીકે ભાવેશભાઈ ત્રાપસીયાનું નામ તેમજ ચંદ્રિકાબેન વાડોદરિયા અને ભરતભાઈ વિરડીયાનું નામ પાર્ટીમાં ઉમેદવાર તરીકે મોકલવામાં આવેલ હોવાનું લોક મૂકે ચર્ચાઈ રહ્યું છે. જયારે ભાજપ ચૂંટણી જાહેર થયા બાદ ઉમેદવાર જાહેર કરે તેવી સંભાવનાઓ જોવા મળે છે.

આ ચૂંટણી જંગમાં હવે પ્રજા શક્તિ ડેમો ક્રેટીક પાર્ટીના રાજકીય વડા અને સ્થાપક એવા શંકરસિંહ વાઘેલા પણ તેમની પાર્ટી તરફથી વિસાવદર ચૂંટણીમાં ઉમેદવાર ઉભો રાખનાર હોય ત્યારે આ ચૂંટણી જંગ ખૂબ જ મહત્વનો બની રહેશે અને આ ચૂંટણી જંગ જીતવા માટે અનેક રાજકીય પક્ષો અપક્ષો તથા ધુરંધરો આ ચૂંટણી મેદાનમાં એકબીજાને ભરી પીવા મેદાને ઉતરશે આ તમામની વચ્ચે પ્રજા શક્તિ ડેમો ક્રેટીક પાર્ટી પોતાનો પગ પેસારો આ સીટમાં કરવા જઈ રહી હોય તેવી રીતે તા. 22 એપ્રિલના રોજ સવારના 9-30 કલાકે શહેરમાં આવેલ સુંદરબા બાગ હોલ ખાતે કાર્યકર્તાઓનું એક સંમેલન પાર્ટીના સ્થાપક પ્રમુખ શંકરસિંહ વાઘેલા દ્વારા યોજવામાં આવેલ છે અને આ કાર્યકર્તા સંવાદ સંમેલનમાં વિસાવદર ભેસાણ અને જુનાગઢ ગ્રામ્ય પંથકના ઘણા બધા રાજકીય લોકો આ કાર્યકર્તા સંમેલનમાં હાજર રહી આ પાર્ટીમાં જોડાનાર હોવાનું હાલ ચર્ચાઇ રહ્યું છે. ત્યારે રાજકીય રીતે બહુ જ મહત્વની ગણાતી આ વિધાનસભામાં ચૂંટણી યોજવા સંબંધે અગાઉ ગુજરાત હાઇકોર્ટમાં અને ઇલેક્શન પિટિશન પેન્ડિંગ હોવાના કારણે ચૂંટણી યોજાઈ શકેલ ન હતી અને પૂર્વ ધારાસભ્ય હર્ષદભાઈ રીબડીયાએ પોતે કરેલી રીટ નામદાર ગુજરાત હાઇકોર્ટમાંથી પરત ખેંચેલ હતી અને આ સિવાયની અન્ય એક રીટ હાલ નામદાર ગુજરાત હાઇકોર્ટમાં પેન્ડિંગ છે અને તેમાં આગામી મુદત બે જુલાઈને હોવાનું પણ હાઇકોર્ટની વેબસાઈટ ઉપર બતાવાઈ રહ્યું છે આ સંજોગોમાં ચૂંટણી પંચ વિધાનસભાની ચૂંટણી જાહેર કરશે કે કેમ તે એક પ્રશ્ન છે અને ચૂંટણીપંચ હાઇકોર્ટમાં મેટર પેન્ડિંગ હોવા છતાં ચૂંટણી આપવાનો નિર્ણય કરશે કે વિસાવદરની ચૂંટણી જાહેર કરશે તે મણ એકનો સવાલ હોવા છતાં હાલ તો આ વિધાનસભામાં દરેક પક્ષો તથા ઉમેદવારો પોતપોતાના પક્ષ માટે ટિકિટ મેળવવા અને પ્રચારમાં અને જીતવા માટેના ચોકઠા ગોઠવી રહ્યા છે.