ખાખીને લજવતી હળવદ પોલીસની ત્રિપુટી: વાડીએ સૂતેલા યુવાનને અડધી રાત્રે ઉઠાડીને ઢોર માર માર્યો

ગંભીરસિંહ, તેજપાલસિંહ અને જમાદાર કિશોર પટેલનો આતંક

ખાસ-ખબર સંવાદદાતા
મોરબી જીલ્લાના હળવદ તાલુકાના અજીતગઢ ગામમાં વાડીએ સૂતેલા મહેશ નામના યુવાનને અડધી રાત્રે ઉઠાડીને દારૂ ક્યાં છે કહીને હળવદ પોલીસના ખાખીને લજવતા જવાનોએ ખોટી રીતે યુવાનને દારૂના કેસમાં ફીટ કરવા બર્બરતાપૂર્વક ઢોર માર માર્યો હતો અને એટલે પૂરું ન થતાં ગાડીમાં બેસાડીને યુવાનના હાથમાં સુયા ખૂંપી દીધા હતા જેથી ભોગ બનનાર યુવાને પોલીસ જવાનોના દમનને પગલે જીલ્લા પોલીસ વડાને લેખિત રજૂઆત કરીને ત્રણેય પોલીસકર્મીઓ વિરૂદ્ધ નામદાર કોર્ટમાં ગુન્હો દાખલ કરવાની મંજૂરી માંગી હતી.

રાક્ષસ સમાન પોલીસકર્મીઓએ યુવાનના હાથમાં સુયા માર્યા!
યુવાનને બેફામ માર મારીને પણ સંતોષ નહીં મળતા આ રાક્ષસ સમાન પોલીસ જવાનોએ યુવાનને ગાડીમાં બેસાડી અંદર લાઈટ બંધ કરીને બંને હાથમાં સુયાથી ચાર પાંચ ઘોદા મારી દીધા હતા ત્યારબાદ રાત્રીના આશરે દોઢથી બે વાગ્યાના ગાળામાં યુવાનને પોલીસ સ્ટેશને લઈ જવામાં આવ્યો હતો અને ત્યાં પણ રૂમમાં પૂરીને ગંભીરસિંહે આખી રાત ધોકાથી બેફામ માર માર્યો હતો.

પોલીસના દમનનો ભોગ બનનાર અજીતગઢના યુવાનની જિલ્લા પોલીસ વડાને અરજી

પોતાની જાતને સિંઘમ સમજતા હળવદ પોલીસનાં ત્રણ જવાનોએ યુવાનને દારૂના કેસમાં ખોટી રીતે ફિટ કરીને બર્બરતા આચરી

આ બનાવ અંગે જીલ્લા પોલીસ વડાને કરાયેલી અરજીમાં જણાવ્યાં મુજબ, હળવદ તાલુકાના અજીતગઢ ગામે રહેતો મહેશ બાબુભાઈ કુરીયા નામનો યુવાન ગત તા. 03-01-2023 ના રોજ રાત્રીના સમયે તેના ખેતરે એરંડાના પાકની દેખરેખ કરીને સૂતો હતો ત્યારે આશરે 12:15 વાગ્યાના અરસામાં હળવદ પોલીસની ટીમ ત્યાં આવી હતી અને મહેશને ઉઠાડીને તેજપાલસિંહ નામના પોલીસ જવાને ઝાપટ મારીને પૂછ્યું હતું કે ઈંગ્લીશ દારૂ ક્યાં છે ત્યારબાદ યુવાનને મારતા મારતા ગાડી પાસે લઈ જવામાં આવ્યો હતો જ્યાં ગંભીરસિંહ નામના પોલીસ જવાને પૂછ્યું હતું કે અમને બાતમી મળી છે, ઈંગ્લીશ દારૂ ક્યાં છે જેથી યુવાને કહેલ કે, હું ક્યારેય દારૂ પીતો નથી કે વેચતો પણ નથી ત્યારબાદ પોલીસે ખેતરમાં બે ત્રણ જગ્યાએ ખાડા કરીને શોધખોળ કરતા કંઈપણ ચીજવસ્તુ મળી ન હતી ત્યારે ફરી પાછો ખેતરના ઝાંપા પાસે યુવાનને મન ફાવે તેમ ગાળો આપીને ઢોર માર માર્યો હતો ત્યારબાદ યુવાનને ઉંચકીને ગાડીમાં ઘા કરીને નાખી દીધો અને રસ્તામાં આવતા રણ વિસ્તારમાં સુવડાવીને પગના તળીયામાં ગંભીરસિંહે ધોકાથી બેફામ માર માર્યો હતો.

ત્રીજા દિવસે જમાદાર કિશોરને ભૂત ચડ્યું’ને યુવાનને ધોકા-પટ્ટા વડે બેફામ માર માર્યો
ગંભીરસિંહે આખી રાત યુવાનને માર માર્યા બાદ ત્રીજા દિવસે એટલે કે તા. 05-01-2023 ના દિવસે સવારે 11 વાગ્યાના અરસામાં યુવાનને બોલાવીને કિશોર પટેલ નામના જમાદારે દારૂ ક્યાં છે તેમ કહીને મન ફાવે તેમ ગાળો આપીને પટ્ટાથી અને ધોકાથી બેફામ માર માર્યો હતો ત્યારબાદ જામીન આવી ગયા છે તેમ કહીને યુવાનને નીચે જવા દેવામાં આવ્યો હતો અને ફરી પાછો ઉપર બોલાવી બેફામ માર મારીને અમારા વિરૂદ્ધ ફરીયાદ કરીશ તો ખોટા કેસમાં ફસાવી દઈશું તેવી ધમકી આપી હતી.

ત્રણેય પોલીસ જવાનો વિરૂદ્ધ કાર્યવાહી કરવા કોળી સમાજ દ્વારા મામલતદારને આવેદન
આ ઘટનાને લઈને હળવદ તાલુકાના કોળી સમાજમાં ભારોભાર રોષ જોવા મળી રહ્યો છે જેને પગલે હળવદ તાલુકા ચુંવાળીયા કોળી સમાજ દ્વારા મામલતદારને આવેદન આપીને આ ત્રણેય પોલીસ જવાનોને સસ્પેન્ડ કરીને કાયદેસરની કાર્યવાહી કરવા માંગ કરી હતી. આ મામલે એસપી કચેરી ખાતે લેખિત તેમજ મૌખિક ફરિયાદ કરવા છતાં પણ કોઈ કાર્યવાહી હાથ થઈ ન હતી જેથી આગામી સમયમાં જો યોગ્ય ન્યાય નહીં મળે તો ગાંધી ચીંધ્યા માર્ગે આંદોલન કરવાની પણ કોળી સમાજે ચીમકી ઉચ્ચારી હતી.