50 રૂપિયાની પોટલીના નશામાં ચૂર મજૂરો ચલાવે છે ભારે મશીનરી; પોલીસની નિષ્ક્રિયતા સામે જખઈ ત્રાટકે તેવી પ્રબળ માંગ
ખાસ-ખબર ન્યૂઝ વીરપુર
- Advertisement -
યાત્રાધામની ગરિમા જોખમાઈ અને ખુલ્લેઆમ વેપલો પૂજ્ય જલારામ બાપાના પવિત્ર ધામ વીરપુરમાં હાલ રાજ્યની દારૂબંધી નીતિના સરેઆમ ધજાગરા ઉડી રહ્યા છે. જેતપુર-રાજકોટ નેશનલ હાઈવે પર ચાલી રહેલી સિક્સ લેન કામગીરીના પ્લાન્ટ નજીક દેશી દારૂના અડ્ડાઓ બેરોકટોક ધમધમી રહ્યા છે. લાખો શ્રદ્ધાળુઓની આસ્થાના કેન્દ્ર સમાન આ નગરમાં ભક્તિમય માહોલને બદલે દારૂની બદબૂ અને નશામાં લથડિયા ખાતા શખ્સો જોવા મળતા ભાવિકોની લાગણી દુભાઈ રહી છે. હાઈવે ઓથોરિટીના પ્લાન્ટ આસપાસ જાણે પાન-બીડીનો ગલ્લો હોય તેમ બુટલેગરો બિન્દાસ દારૂ વેચી રહ્યા છે.
સ્થાનિક પોલીસની ભૂમિકા સામે સવાલો લોકમુખે ચર્ચાતી વિગતો મુજબ, આટલા મોટા પાયે ચાલતા દારૂના વેપલા પાછળ સ્થાનિક પોલીસની કથિત હપ્તાખોરી અને મિલીભગત જવાબદાર હોવાનું મનાય છે. સ્થાનિકોનો આક્ષેપ છે કે ભ્રષ્ટ સ્ટાફ બુટલેગરો પાસેથી દર મહિને મોટી રકમની ’લોણી’ ઉઘરાવતો હોવાથી આ હાટડાઓ સામે આંખ આડા કાન કરવામાં આવે છે. જ્યારે પણ કોઈ રજૂઆત થાય ત્યારે દેખાવ પૂરતી કામગીરી કરીને ફરી ધંધો રાબેતા મુજબ ચાલુ કરી દેવાય છે. આ નિષ્ક્રિયતાથી કંટાળેલા જાગૃત નાગરિકો હવે સ્ટેટ મોનિટરિંગ સેલ (જખઈ) ની ટીમ સીધી રેડ પાડે તેવી આશા રાખી રહ્યા છે.
વીરપુર જેવું સંવેદનશીલ અને પવિત્ર સ્થળ હોવા છતાં પોલીસની રહેમનજર હેઠળ ચાલતું આ દારૂનું નેટવર્ક શરમજનક છે. ગ્રામજનોની માંગ છે કે આ દારૂના અડ્ડાઓ કાયમી ધોરણે બંધ કરાવવામાં આવે અને જે પોલીસકર્મીઓ આમાં સંડોવાયેલા હોય તેમની સામે પણ કડક પગલાં લેવામાં આવે. હાઈવે પર થતી આ અનૈતિક પ્રવૃત્તિ જો અટકાવવામાં નહીં આવે તો ભવિષ્યમાં કોઈ મોટી જાનહાનિ સર્જાય તેવો ભય પણ વ્યક્ત કરવામાં આવ્યો છે.
મજૂરોની કબૂલાત: ‘સાહેબ, અહીં જ મળે છે!’
ચોંકાવનારો ઘટસ્ફોટ વીરપુર હાઈવે પર કામ કરતા ડ્રાઈવરો અને શ્રમિકોએ કેમેરા સામે જ કબૂલાત કરી છે કે તેમને દારૂ લેવા ક્યાંય જવું પડતું નથી, બુટલેગરો સામે ચાલીને અહીં જ ડિલિવરી આપી જાય છે.
ગંભીર જોખમની ચેતવણી
- Advertisement -
શ્રમિકો 50-50 રૂપિયાની પોટલીઓ પીને ભારે મશીનરી અને મસમોટા ડમ્પરો ચલાવે છે.
નશાની હાલતમાં વાહન ચલાવતા આ મજૂરો ગમે ત્યારે મોટી દુર્ઘટના સર્જી શકે છે.
પોલીસ પેટ્રોલિંગના નામે માત્ર આંટાફેરા થતા હોવાથી બુટલેગરોને ખાખી વર્દીનો કોઈ ડર રહ્યો નથી.
