બાંગ્લાદેશમાં હિંસા: જેલમાંથી 500 કેદીઓ છોડાવ્યા, 8 લોકોને જીવતા સળગાવ્યાં

બાંગ્લાદેશમાં ગઇકાલે શેખ હસીનાએ વડાપ્રધાન પદેથી રાજીનામું આપી દેશ છોડ્યા પછી પણ હિંસા અટકી  નથી. હવે બદમાશો લઘુમતી હિંદુઓ, શેખ હસીના અને તેમની પાર્ટી અવામી લીગના સમર્થકો અને તેમના સંગઠનોને નિશાન બનાવી રહ્યા છે. સોમવારે બદમાશોએ જેસોરમાં એક હોટલમાં આગ લગાવી હતી જેમાં આઠ લોકો દાઝી ગયા હતા અને 84 લોકો ઘાયલ થયા હતા. જે હોટલમાં આગ લાગી તે અવામી લીગના નેતા શાહીન ચકલાદારની છે. ચકલાદાર જેસોર જિલ્લાના અવામી લીગના જનરલ સેક્રેટરી છે.

બદમાશોએ જેલ પર હુમલો કરી 500 કેદીઓને ભગાડ્યા

બાંગ્લાદેશના અગ્રણી અખબાર ડેઈલી સ્ટારે પોતાના અહેવાલમાં કહ્યું છે કે, દેશમાં હિન્દુઓ પર હુમલા થઈ રહ્યા છે. ગઈકાલે ઓછામાં ઓછા 27 જિલ્લાઓમાં હિંદુ ઘરો અને વ્યવસાયિક સંસ્થાઓ પર ટોળાં દ્વારા હુમલો કરવામાં આવ્યો હતો જ્યારે તેમની કિંમતી વસ્તુઓ પણ લૂંટાઈ હતી. લાલમોનીરહાટના તેલીપારા ગામમાં દુષ્કર્મીઓએ પૂજા ઉદજાપન પરિષદના સચિવ પ્રદીપ ચંદ્ર રોયના ઘરમાં તોડફોડ કરી અને લૂંટ ચલાવી. તેઓએ થાણા રોડ પર જિલ્લાની પૂજા ઉદ્જાપન પરિષદના મ્યુનિસિપલ સદસ્ય મુહીન રોયની કોમ્પ્યુટરની દુકાનમાં પણ તોડફોડ કરી અને લૂંટ ચલાવી. આ સિવાય જિલ્લાના કાલીગંજ ઉપજિલ્લાના ચંદ્રપુર ગામમાં ચાર હિંદુ પરિવારોના ઘરોમાં તોડફોડ અને લૂંટફાટ કરવામાં આવી હતી.

બદમાશોએ ક્રિકેટર મશરફી મોર્તઝાનું ઘર સળગાવી દીધું

બદમાશોએ અવામી લીગના સાંસદ કાઝી નબીલના નિવાસસ્થાને પણ તોડફોડ કરી અને આગ લગાડી. બાંગ્લાદેશ ક્રિકેટ ટીમના પૂર્વ કેપ્ટન મશરફે મોર્તઝાના ઘરને પણ આગ લગાડવામાં આવી હતી. મુર્તઝા અવામી લીગના નેતા છે. તેમણે શેખ હસીનાની પાર્ટી તરફથી જાન્યુઆરીમાં યોજાયેલી સામાન્ય ચૂંટણી લડી અને સંસદ સભ્ય બન્યા.

રાજધાની ઢાકામાં વિવિધ સ્થળોએ હજારો લોકો વડાપ્રધાન શેખ હસીનાના રાજીનામાની ઉજવણી કરતા જોવા મળ્યા હતા. ઉજવણી દરમિયાન કેટલાક લોકોએ ચિત્તમોર વિસ્તારમાં જબીર હોટલમાં આગ લગાવી અને તેના ફર્નિચરની તોડફોડ કરી. આ ઉપરાંત જિલ્લા અવામી લીગની ઓફિસ અને શારશા અને બેનાપોલ વિસ્તારમાં વધુ ત્રણ અવામી લીગ નેતાઓના ઘરો પર બદમાશો દ્વારા હુમલો કરવામાં આવ્યો હતો.

બાંગ્લાદેશમાં 4 ઓગસ્ટે 98 પ્રદર્શનકારીઓ માર્યા ગયા

4 ઓગસ્ટના રોજ પીએમ શેખ હસીનાના રાજીનામાની માંગ કરી રહેલા હજારોની ભીડને વિખેરવા માટે પોલીસે ટીયર ગેસ અને રબરની ગોળીઓનો ઉપયોગ કર્યો હતો. આ બળપ્રયોગમાં ઓછામાં ઓછા 98 લોકો માર્યા ગયા અને સેંકડો ઘાયલ થયા. 4 ઓગસ્ટની હિંસા બાંગ્લાદેશમાં નાગરિક અશાંતિના તાજેતરના ઇતિહાસમાં સૌથી ભયંકર દિવસો પૈકી એક છે. આ પહેલા 19 જુલાઈના રોજ સરકારી નોકરીઓમાં ક્વોટા સિસ્ટમનો વિરોધ કરતા વિદ્યાર્થીઓએ 67 લોકોના મોત નીપજ્યા હતા.

વિવાદાસ્પદ ક્વોટા સિસ્ટમ સામે વિરોધ શરૂ થયો

ક્વોટા સિસ્ટમ સામે હાઈકોર્ટના આદેશને પગલે ગયા મહિને શરૂ થયેલા વિરોધ પ્રદર્શનો નાટકીય રીતે વધી ગયા હતા જ્યારે દેશની સૌથી મોટી ઢાકા યુનિવર્સિટીમાં આંદોલનકારી વિદ્યાર્થીઓએ પોલીસ અને સરકાર તરફી વિરોધીઓ સાથે હિંસક અથડામણ કરી હતી. આ વિરોધોના મૂળ વિવાદાસ્પદ ક્વોટા પ્રણાલીમાં રહેલા છેજે બાંગ્લાદેશની 1971ની સ્વતંત્રતાની લડાઈમાં પાકિસ્તાન સામે લડેલા સ્વાતંત્ર્ય સેનાનીઓના પરિવારના સભ્યો માટે 30 ટકા જેટલી સરકારી નોકરીઓ અનામત રાખે છે. જો કે, આંદોલન વચ્ચે સુપ્રીમ કોર્ટે એક ઐતિહાસિક નિર્ણયમાં આ ક્વોટા સિસ્ટમ નાબૂદ કરી અને 93 ટકા ભરતીઓ મેરિટના આધારે કરી અને અનામતનો વિસ્તાર માત્ર 7 ટકા સુધી મર્યાદિત કર્યો હતો.