વેનેઝુએલાના રાષ્ટ્રપતિ નિકોલસ માદુરોના દિવસો હવે ‘ગણતરીના’ રહ્યા છે: ડોનાલ્ડ ટ્રમ્પ

અમેરિકા દુનિયામાં યુદ્ધનો એક નવો મોરચો ખોલી રહ્યું છે, જ્યાં ડોનાલ્ડ ટ્રમ્પે જાહેરાત કરી છે કે વેનેઝુએલાના રાષ્ટ્રપતિ નિકોલસ માદુરોના દિવસો હવે ‘ગણતરીના’ રહ્યા છે. ટ્રમ્પે આ નિવેદન ત્યારે આપ્યું જ્યારે અમેરિકા 35થી વધુ વર્ષોમાં પહેલીવાર કેરેબિયન ક્ષેત્રમાં સૌથી મોટું સૈન્ય નિર્માણ/અપગ્રેડેશન કરી રહ્યું છે.

રવિવારના એક ઇન્ટરવ્યૂમાં ટ્રમ્પે ટિપ્પણી કરી હતી કે માદુરોનું શાસન અમેરિકામાં ડ્રગ્સ અને ગુનાઓનું કારણ છે સાથે જ તે વેનેઝુએલાના લોકોના મોટા પાયે પલાયન માટે પણ જવાબદાર છે. ટ્રમ્પે ભારપૂર્વક કહ્યું કે, વેનેઝુએલા અમેરિકા સાથે ખૂબ ખરાબ વ્યવહાર કરી રહ્યું છે. તેમણે આરોપ લગાવ્યો કે માદુરોએ ડ્રગ્સ ઉપરાંત લાખો અનિચ્છનીય લોકોને જેલોમાંથી અને માનસિક સંસ્થાઓમાંથી પણ લોકોને, યુનાઇટેડ સ્ટેટ્સમાં મોકલીને પોતાની જેલો ખાલી કરી દીધી છે.

ટ્રમ્પના બીજા કાર્યકાળમાં તણાવ ચરમસીમાએ

ટ્રમ્પ વહીવટીતંત્ર માદુરોને નાર્કો-ટેરરિસ્ટ ગણે છે અને કથિત ડ્રગ્સ તસ્કરીના આરોપો પર સૈન્ય કાર્યવાહી કરી રહ્યું છે. આ જ સંદર્ભમાં, ટ્રમ્પે ભારપૂર્વક કહ્યું છે કે વેનેઝુએલાના રાષ્ટ્રપતિ તરીકે નિકોલસ માદુરો પાસે હવે ગણતરીના દિવસો રહ્યા છે. માદુરો 2013થી વેનેઝુએલાનું શાસન સંભાળી રહ્યા છે. તેમના પર 2019 અને 2023ની સતત બે ચૂંટણીઓમાં ધમકી આપીને જીત મેળવવાનો આરોપ છે અને નિરીક્ષકોનું માનવું છે કે નિષ્પક્ષ ચૂંટણી થઈ હોત તો તેઓ ખરાબ રીતે હારી ગયા હોત.

વેનેઝુએલાના વિપક્ષી નેતા અને 2025ના નોબેલ શાંતિ પુરસ્કાર વિજેતા મારિયા કોરિના મચાડોએ નિવેદન આપ્યું છે કે માદુરોને સત્તા પરથી હટાવવામાં આવે તો માદુરોના શાસનથી ભાગી ગયેલા 80 લાખ વેનેઝુએલાવાસીઓમાંથી ઘણા પોતાના દેશ પાછા ફરશે.

અમેરિકાની સૈન્ય તૈયારી

અમેરિકી સેના કેરેબિયનમાં લાંબા સમયથી બંધ પડેલા શીત યુદ્ધ સમયના એક નૌસૈનિક અડ્ડાને અપગ્રેડ કરી રહી છે, જે સતત સૈન્ય અભિયાનોની તૈયારી અને વેનેઝુએલામાં સંભવિત સૈન્ય કાર્યવાહીનો સંકેત આપે છે.

રોયટર્સ દ્વારા લેવાયેલી તસવીરો મુજબ, પ્યુર્ટો રિકોમાં પૂર્વ રૂઝવેલ્ટ રોડ્સ નૌસૈનિક અડ્ડા પર નિર્માણ કાર્ય ચાલી રહ્યું છે. આ અડ્ડો 20 વર્ષથી વધુ સમય પહેલા અમેરિકી નૌસેનાએ બંધ કરી દીધો હતો અને હવે તેને ફરીથી ઉપયોગમાં લેવા માટે તૈયાર કરાઈ રહ્યો છે. આ નૌસૈનિક અડ્ડો વેનેઝુએલાથી લગભગ 500 માઇલના અંતરે આવેલો છે. એક સમયે દુનિયાના સૌથી મોટા અમેરિકી નૌસૈનિક અડ્ડાઓમાંના એક એવા રૂઝવેલ્ટ રોડ્સને વ્યૂહાત્મક સ્થાન પર આવેલો ગણવામાં આવે છે અને તે સાધનો એકઠા કરવા માટે પૂરતી જગ્યા પૂરી પાડે છે. રૂઝવેલ્ટ રોડ્સ પર લેન્ડિંગ અને ટેક-ઓફની ક્ષમતાઓને અપગ્રેડ કરવા ઉપરાંત, અમેરિકા પ્યુર્ટો રિકો અને યુએસ વર્જિન આઇલેન્ડ્સના સેન્ટ ક્રોઇક્સમાં પણ વેનેઝુએલાથી લગભગ 500 માઇલના અંતરે આવેલા સિવિલિયન એરપોર્ટ્સ પર સુવિધાઓનું નિર્માણ કરી રહ્યું છે.