ગુજરાત રાજ્યની ન્યાય પ્રક્રિયામાં ટેકનોલોજીનો ઉપયોગ વધ્યો: 41% કેદી VC દ્વારા કોર્ટમાં રજૂ

VC સિસ્ટમથી સમય, માનવ સંસાધન અને નાણાની બચત

ખાસ-ખબર ન્યૂઝ રાજકોટ

ગુજરાત સમગ્ર ન્યાય પ્રક્રિયાને વધુ ઝડપી અને કાર્યક્ષમ બનાવવા માટે ટેકનોલોજીનો મહત્તમ ઉપયોગ કરી રહ્યું છે. પોલીસ, જેલ અને ન્યાયપાલિકાના સુદ્રઢ સંકલનથી, કેદીઓને નામદાર કોર્ટમાં રજૂ કરવા માટે વીડિયો કોન્ફરન્સિંગ (VC) સિસ્ટમનો ઉપયોગ કરવામાં ગુજરાત અગ્રેસર રહ્યું છે.
રાજ્યની જેલોમાંથી મહત્તમ કેદીઓને નામદાર કોર્ટ સમક્ષ વીડિયો કોન્ફરન્સ સિસ્ટમ દ્વારા રજૂ કરવાની પ્રક્રિયામાં નોંધપાત્ર પ્રગતિ થઈ છે. આના પરિણામે પોલીસ વિભાગને માનવ સંસાધન, સમય અને નાણાકીય બચત પણ થઈ રહી છે.
વર્ષ 2022માં ગુજરાત હાઈકોર્ટ દ્વારા રાજ્યભરની કોર્ટો ખાતે કુલ 1100 યુનિટ VC સિસ્ટમ સ્થાપિત કરવામાં આવી હતી, જેમાં રાજ્યની જેલો ખાતે 23 યુનિટ સોફ્ટવેર બેઝ્ડ ટઈ સિસ્ટમ ફાળવવામાં આવી છે. હાલમાં, રાજ્યની જેલો ખાતે કુલ 83 વીડિયો કોન્ફરન્સિંગ સિસ્ટમ કાર્યરત છે.
આ પ્રણાલીના અસરકારક અમલથી પોલીસ વિભાગમાં માનવ સંસાધનો, સમય અને નાણાકીય બચત થઈ છે. જાપ્તામાં રોકાયેલા કર્મચારીઓને અન્ય જગ્યાએ ફરજો સોંપવાનું પણ શક્ય બન્યું છે, જેનાથી વિભાગની કાર્યક્ષમતામાં વધારો થયો છે.
આ પદ્ધતિ ન્યાય પ્રક્રિયાને ઝડપી બનાવવામાં મદદરૂપ થઈ છે, જેના પરિણામે ભોગ બનનારને ઝડપી ન્યાય અને ગુનેગારને સજા મળે છે.
કેદીઓને નામદાર કોર્ટમાં રજૂ કરવા માટે વીડિયો કોન્ફરન્સિંગના માધ્યમનો ઉપયોગ કરવામાં ગુજરાત અગ્રેસર રહ્યું છે, જે ટેકનોલોજીના ઉપયોગ દ્વારા ન્યાય પ્રણાલીને સુધારવા માટેની રાજ્ય સરકારની પ્રતિબદ્ધતા દર્શાવે છે. રાજ્યના પોલીસ વડા વિકાસ સહાય અને જેલ ડીજીપી કે.એલ.એન. રાવના માર્ગદર્શન હેઠળ આ પહેલને વધુ વેગ આપવામાં આવી રહ્યો છે.

ગુજરાત જેલ વિભાગના આંકડા VC પદ્ધતિની સફળતા દર્શાવે છે

જાન્યુઆરી-જૂન 2024: ગુજરાત જેલ વિભાગ હેઠળની તમામ જેલો દ્વારા 40,633 કેદીઓને (સરેરાશ 29%) ટઈના માધ્યમથી સંબંધિત કોર્ટમાં રજૂ કરવામાં આવ્યા હતા.

જાન્યુઆરી-જૂન 2025: આ આંકડો વધીને સરેરાશ 41% થયો છે, જેમાં કુલ 53,672 કેદીઓને વીડિયો કોન્ફરન્સિંગના માધ્યમથી સંબંધિત કોર્ટમાં રજૂ કરવામાં આવ્યા છે.