અમેરિકા હમાસ સમર્થક વિદ્યાર્થીઓના વિઝા રદ્દ કરશે, રાષ્ટ્રપતિ ડોનાલ્ડ ટ્રંપનું એલાન

અમેરિકાના રાષ્ટ્રપતિ ટ્રમ્પે કહ્યું છે કે એવા તમામ વિદેશી સ્ટુડન્ટ્સ, જેમણે જેમણે પેલેસ્ટાઇનના સમર્થનમાં પ્રદર્શનોમાં ભાગ લીધો, તેમને નોટિસ જારી કરવામાં આવશે. અમે તમને શોધી કાઢીશું અને ડિપોર્ટ કરીશું. બધા હમાસ સમર્થકોના સ્ટુડન્ટ વિઝા તાત્કાલિક અસરથી રદ કરીશ.

અમેરિકાના રાષ્ટ્રપતિ બન્યા બાદ ડોનાલ્ડ ટ્રમ્પ એક પછી એક કડક નિર્ણયો લઈ રહ્યા છે. ત્યારે હવે અમેરિકામાં ગેરકાયદેસર ઇમિગ્રન્ટ્સની સમસ્યાને ખતમ કરવા માટેના રાષ્ટ્રપતિ ડોનાલ્ડ ટ્રમ્પના અભિયાનમાં હમાસ સમર્થકો પર ગાજ પડવાની છે. ટ્રમ્પે જાહેરાત કરી છે કે તેમની સરકાર ઇમિગ્રન્ટ કોલેજ સ્ટુડન્ટ્સ અને હમાસ સમર્થકોને શક્ય તેટલી વહેલી તકે અમેરિકાથી ડિપોર્ટ કરવા જઈ રહી છે.

વ્હાઇટ હાઉસ દ્વારા જારી કરાયેલા એક નિવેદનમાં કહેવામાં આવ્યું છે કે રાષ્ટ્રપતિ ટ્રમ્પ દ્વારા જારી કરાયેલા આદેશમાં ન્યાય વિભાગને એવા આદેશ આપવામાં આવ્યા છે કે અમેરિકન યહૂદીઓ વિરુદ્ધ આતંકી જોખમો, આગચંપી, તોડફોડ અને હિંસાને લઈને તાત્કાલિક કાર્યવાહી કરવામાં આવે. આ સંદર્ભમાં, ફેક્ટશીટમાં, ટ્રમ્પે કહ્યું છે કે એવા તમામ વિદેશી વિદ્યાર્થીઓ જેમણે પેલેસ્ટાઇનના સમર્થનમાં પ્રદર્શનોમાં ભાગ લીધો, તેમને નોટિસ જારી કરવામાં આવશે. અમે તમને શોધી કાઢીશું અને દેશનિકાલ કરીશું. હું કોલેજ કેમ્પસમાં એ બધા હમાસ સમર્થકોના સ્ટુડન્ટ વિઝા તાત્કાલિક અસરથી રદ કરીશ.

જણાવી દઈએ કે આ સંદર્ભમાં, ટ્રમ્પે બુધવારે એક કાર્યકારી આદેશ પર હસ્તાક્ષર કર્યા છે, જેનો ઉદ્દેશ્ય યહૂદી વિરોધી પ્રવૃત્તિઓને ખતમ કરવાનો અને એ લોકોને દેશમાંથી બહાર કાઢવાનો છે, જેઓએ પેલેસ્ટાઇન અને હમાસના સમર્થનમાં પ્રદર્શન કર્યું હતું.

જણાવી દઈએ કે 7 ઓક્ટોબર, 2023 ના રોજ હમાસે ઇઝરાયલ પર હુમલો કર્યો હતો, જે પછી બંને વચ્ચે 15 મહિનાથી યુદ્ધ ચાલી રહ્યું છે. હમાસના હુમલાઓ અને ત્યારબાદ ગાઝા પર ઇઝરાયલી હુમલાના કારણે કેટલાય મહિનાઓથી પેલેસ્ટાઇનના સમર્થનમાં અમેરિકાના ઘણા કોલેજ કેમ્પસમાં સતત વિરોધ પ્રદર્શનો થઈ રહ્યા છે. વિદ્યાર્થીઓએ ઇઝરાયલ અને યહૂદીઓ વિરુદ્ધ ઘણા વિરોધ પ્રદર્શનો કર્યા, અને યહૂદી વિદ્યાર્થીઓને માર મારવામાં આવ્યાના અહેવાલો પણ હતા. નાગરિક અધિકાર જૂથો આ હુમલાઓને આરબ અને મુસ્લિમ વિરોધી ગણાવી રહ્યા છે.