ટ્રમ્પની ટીમ દ્વારા રસ્તામાં રોકી દસ્તાવેજોની ચકાસણી, ઘર-ઑફિસમાં ઘૂસીને ચેકિંગ કરાતા ભારતીયોમાં ફફડાટ

ખાસ-ખબર ન્યૂઝ  રાજકોટ

અમેરિકન પ્રમુખ ડોનાલ્ડ ટ્રમ્પે સત્તા સંભાળવાની સાથે ચૂંટણી પ્રચારમાં આપેલા વચન મુજબ ગેરકાયદે વસાહતીઓ પર તવાઈ શરૂ થઈ ગઈ છે. ટ્રમ્પે ગેરકાયદે વસાહતીઓ વિરુદ્ધ સૌથી મોટું અભિયાન શરૂ કર્યું છે, જેના ભાગરૂપે ઈમિગ્રેશન અધિકારીઓ કોઈના પણ ઘરમાં, ઓફિસોમાં ઘૂસીને તપાસ કરે છે. તેમને સંતોષકારક જવાબ ના મળે તો જે-તે વ્યક્તિની અટકાયત કરતાં પણ ખચકાતા નથી, જેને પગલે ગુજરાતીઓમાં ભારે ગભરાટ ફેલાયો છે. બીજીબાજુ ટ્રમ્પ સરકાર દ્વારા ડીપોર્ટેશનના ભયથી ભારતીય વિદ્યાર્થીઓ અભ્યાસની સાથેની પાર્ટ-ટાઈમ નોકરીઓ છોડી રહ્યા છે. તપાસ એજન્સીઓ વારંવાર તેમના આઈડી ચકાસી રહી છે.

અમેરિકા દાયકાઓથી યુવાનો વિશેષરૂપે ભારતીય યુવાનો માટે વૈશ્ર્વિક સ્તરના શિક્ષણ અને ઊંચા પગારની તકો સહિત અનંત સંભાવનાઓની ભૂમિ રહી છે. જોકે, ડોનાલ્ડ ટ્રમ્પે બીજા કાર્યકાળમાં આકરી ઈમિગ્રેશન નીતિ અપનાવવાના કારણે સેંકડો યુવાનો માટે તેમનું અમેરિકન સ્વપ્ન ચકનાચુર થઈ ગયું છે. વિઝા અરજીઓ નકારી કાઢવા સાથે કામના સ્થળે વારંવાર તપાસ અને અનિશ્ર્ચિતતા વધવાને કારણે સેંકડો વિદ્યાર્થીઓએ અભ્યાસની સાથે નોકરીનો વિકલ્પ પડતો મૂકવો પડયો છે. તેઓ હવે પાર્ટ-ટાઈમ નોકરી છોડી રહ્યા છે.

છેલ્લા એક વર્ષમાં અમેરિકન સરકાર દ્વારા ભારતીય વિદ્યાર્થીઓને ઈશ્ર્યુ કરવામાં આવતા એફ-1 સ્ટુડન્ટ વિઝાની સંખ્યામાં નોંધપાત્ર ઘટાડો આવ્યો છે. યુએસ સ્ટેટ ડિપાર્ટમેન્ટ ડેટાના વિશ્ર્લેષણ મુજબ જાન્યુઆરીથી સપ્ટેમ્બર 2024 વચ્ચે 64,008 ભારતીય વિદ્યાર્થીઓના વિઝા મંજૂર કરાયા હતા, જે 2023માં સમાન સમયમાં 1,03,495 વિઝાની સરખામણીમાં 38 ટકાનો ઘટાડો દર્શાવે છે. આ બાબત દર્શાવે છે કે વિદ્યાર્થીઓમાં પ્રમુખ તરીકે ટ્રમ્પના આગમન પહેલાં જ ડર છવાયેલો હતો. ટ્રમ્પ પ્રમુખ બનતાં વિદ્યાર્થીઓને હવે ડિપોર્ટેશનનો ભય સતાવી રહ્યો છે. બીજી બાજુ ટ્રમ્પ પ્રમુખ બન્યા પછી ટેક્સાસ, કેલિફોર્નિયા, ન્યૂયોર્ક, ઈલિયોનોઈસમાં રહેતા અને અવર-જવર કરતાં ગુજરાતીઓને ઈમિગ્રેશન અધિકારીઓ રસ્તામાં રોકીને પણ તેમના દસ્તાવેજો વિશે પૂછપરછ કરે છે, જેની ગંભીર અસર ભારતીયો અને ખાસ કરીને મોટી સંખ્યામાં ગુજરાતી પરિવારો પર પડી રહી છે.

આ અંગે અમેરિકન સંવિધાન પ્રમાણે શું કરવું અને શું ના કરવું એ અંગેની માહિતી દરેક શહેરોમાં વસતા અને દરેક ગૂ્રપના ગુજરાતીઓએ બહાર પાડી છે. ડોનાલ્ડ ટ્રમ્પ સરકાર દ્વારા 104 ગેરકાયદે ભારતીય વસાહતીઓને ડિપોર્ટ કરાયા અને વધુ 687 ભારતીયોને અમેરિકામાંથી કાઢી મુકવાની તૈયારી ચાલી રહી છે ત્યારે અમેરિકાના વિવિધ શહેરોમાં રહેતાં ગુજરાતીઓમાં ગમે ત્યારે ગમે તે થઈ શકે તેવો ગભરાટ ફેલાયેલો છે.