હજુ ત્રણ દિવસ હિટ વેવનું યલો એલર્ટ
કંડલા, અમરેલી, રાજકોટ અને સુરેન્દ્રનગરમાં 42 ડિગ્રીને પાર કરતું તાપમાન
ઉનાળાની સીઝન શરૂઆત જ વધુ જોરદાર રહી છે. સામાન્ય રીતે માર્ચ માસમાં ગરમીની શરૂઆત થતી હોય છે અને ત્યારે મહતમ તાપમાનનો પારો 40 ડિગ્રી નીચે રહેતો હોય છે. પરંતુ સૌરાષ્ટ્ર સહિત રાજ્યના અનેક વિસ્તારોમાં હીટવેવ કન્ડિશનના કારણે મહત્તમ તાપમાન 42 ડિગ્રીને પાર કરી ગયું છે. હવામાન ખાતાના જણાવ્યા મુજબ હજુ આગામી ત્રણ દિવસ સુધી ગરમીનું જોર રહેશે અને ઉત્તર ગુજરાત કચ્છ સહિત રાજ્યના અનેક વિસ્તારોમાં હીટ વેવ કન્ડિશન યથાવત રહેશે. અમદાવાદ ગાંધીનગર સાબરકાંઠા પાટણ મહેસાણા રાજકોટ અમરેલી પોરબંદર સુરેન્દ્રનગર સહિતના રાજ્યના અનેક જિલ્લાઓમાં આગામી ત્રણ દિવસ સુધી હીટ વેવ રહેશે.સમગ્ર રાજ્યમાં સૌથી ઊંચું તાપમાન કંડલા એરપોર્ટ પર 42.6 ડિગ્રી નોંધાયું છે. રાજકોટમાં 42.3 અમરેલીમાં 42.2 અને સુરેન્દ્રનગરમાં 42 ડિગ્રી મહત્તમ તાપમાન રહ્યું છે. રાજ્યના અનેક વિસ્તારોમાં મહત્તમ તાપમાનનો પારો 42 ડિગ્રીને લગોલગ પહોંચી ગયો છે અને માર્ચ મહિનામાં જ ગરમીએ તેના વર્ષો જૂના રેકોર્ડ તોડી નાખ્યા છે.હજુ એપ્રિલ અને મે મહિનો બાકી છે.ત્યારે તાપમાનનો પારો ત્યાં સુધી પહોંચે એ વિચાર લોકોને પરસેવો વાળી દે છે.
દેશના અનેક રાજ્યોમાં હીટવેવની ચેતવણી
ઈન્ડિયન મેટ્રોલોજીકલ ડિપાર્ટમેન્ટના જણાવ્યા મુજબ આગામી ત્રણ દિવસ સુધી રાજસ્થાન ગુજરાત મધ્ય પ્રદેશ હરિયાણા પંજાબ દિલ્હી જમ્મુ કાશ્મીર ઉત્તર પ્રદેશ બિહાર હિમાચલ પ્રદેશ ઈડર અને વેસ્ટર્ન હિમાલયન રીજીયનમાં હિટ વેવ કન્ડિશન સર્જાવા પામશે.
- Advertisement -
તોફાની પવન સાથે વરસાદની દક્ષિણ- પૂર્વોત્તર રાજ્યોમાં ચેતવણી
એક બાજુ દેશના મોટાભાગના વિસ્તારો કાળઝાળ ગરમીમાં ત્રાહિમામ થઈ ગયા છે તો બીજી બાજુ આસામ મેઘાલય કેરળ, તમિલનાડુ પોંડિચેરી અને કોસ્ટલ કર્ણાટક સહિતના દક્ષિણ અને પૂર્વોત્તર રાજ્યોમાં આગામી તારીખ 1 એપ્રિલ સુધી ભારેથી અતિભારે વરસાદની ચેતવણી આપવામાં આવી છે. બંગાળની ખાડીમાં ઉદ્ભવેલી સિસ્ટમના કારણે પૂર્વોત્તર અને દક્ષિણના રાજ્યોમાં પ્રતિ કલાકના 50 કિલોમીટરની ઝડપે તોફાની પવન ફૂંકાશે. વીજળીના ચમકારા અને મેઘગર્જના સાથે આ તમામ રાજ્યોમાં વરસાદની ચેતવણી આપવામાં આવી છે.
આ પણ વાંચો: 28 માર્ચથી 3 એપ્રિલ સુધીનું સાપ્તાહિક રાશિફળ
https://khaskhabarrajkot.com/2022/03/28/weekly-horoscope-from-march-28-to-april-3/
