માત્ર દોઢ મહીનામાં 50% પાણીની આવક: સૌથી વધુ રાજકોટ અને
સૌથી ઓછો વિંછીયામાં વરસાદ નોંધાયો
ખાસ-ખબર સંવાદદાતા
રાજકોટ જિલ્લામાં વિવિધ વિસ્તારોમાં વરસાદના કારણે દરેક ડેમ ઓવરફ્લો થઈ ગયા છે. રાજકોટ જિલ્લાના ફોફળ-1, છાપરવાડી-2, આજી સહિતના તમામ ડેમોની જળસપાટીમાં વધારો થઈ ગયો છે તથા છેલ્લાં 30 વર્ષમાં હાઈએસ્ટ વરસાદ આજદિન સુધી રાજકોટ જિલ્લામાં નોંધાયો છે. માત્ર દોઢ મહીનામાં 50 ટકા પાણીની આવક થતાં જગતનો તાત ખુશખુશાલ થઈ ગયો છે. વધુમાં આજરોજ રાજકોટ જિલ્લા કલેકટરે જણાવ્યું હતું કે રાજકોટ જિલ્લામાં થયેલી નુકસાનીમાં 13 રોડ ડેમેજ થયા છે. જામકંડોરણા પાસેનો 1 પુલ બેસી ગયો છે. ધોરાજી-ઉપલેટામાં તથા નાનીસુપેડી પાસે રોડને નુકસાન થતાં કામગીરી ત્વરિત ચાલુ કરવામાં આવી છે. ઉપરાંત આજીમાં બે લોકોને રેસ્ક્યુ કરી બચાવાયા તથા બે માનવ મૃત્યુ થયા છે જેમને 4 લાખની સહાય સરકાર તરફથી આપવામાં આવશે.વીજળી પડવાથી પાંચ પશુઓના મૃત્યુ થયા છે, જેમને કેટેગરીવાઈઝ સહાય આપવામાં આવશે.
- Advertisement -
હવામાન વિભાગ દ્વારા ગુજરાત રાજ્યમાં અનેક જિલ્લાઓમાં ભારે વરસાદની આગાહી અનુસંધાને રાજકોટ જિલ્લો રેડએલર્ટ ઝોનમાં હતો જે હવે યલોમાં આવી જતાં વરસાદનું જોખમ ઘટી જવા પામ્યું છે. તા. 1લી જૂનથી આજદિન સુધીમાં 701 મી.મી. વરસાદ વરસ્યો છે. રાજકોટ સહિત જિલ્લાઓમાં સારો વરસાદ વરસતાં લોકોમાં ખુશીનો માહોલ છવાયો છે તથા જળસંકટ ટળ્યું છે.
પરંતુ સાથે જ વિંછીયા ખાતે સૌથી ઓછો એટલે કે અંદાજે 1 ઈંચ જેટલો વરસાદ પડ્યો છે તેવું જિલ્લા કલેકટર તંત્રની યાદીમાં જણાવાયું હતું.
