ખાસ-ખબર ન્યૂઝ જૂનાગઢ, તા.18
જૂનાગઢ મહાનગરપાલિકાની સ્થાયી સમિતિની મહત્વની બેઠક ચેરમેન પલ્લવીબેન ઠાકરના અધ્યક્ષસ્થાને યોજાઈ હતી. આ બેઠકમાં મેયર ધર્મેશ પોશીયા, ડે. મેયર આકાશભાઈ કટારા અને અન્ય સદસ્યોની ઉપસ્થિતિમાં શહેરના હિતમાં અનેક મહત્વના નિર્ણય લેવામાં આવ્યા હતા.
વર્ષોથી પેન્ડિંગ એવા જોષીપરા માઇક્રો શોપિંગ સેન્ટરના ભાડા અને ટ્રાન્સફર ફીના દર આ બેઠકમાં નક્કી કરવામાં આવ્યા છે. ગ્રાઉન્ડ ફ્લોર માટે રૂ. 1000, પ્રથમ માળ માટે રૂ. 700 અને બીજા માળ માટે રૂ. 500 નક્કી કરાયા. ગ્રાઉન્ડ ફ્લોર માટે રૂ. 1,25,000, પ્રથમ માળ માટે રૂ. 1,00,000 અને બીજા માળ માટે રૂ. 75,000 નક્કી કરવામાં આવ્યા છે. આ નિર્ણયથી મિલકત ધારકોના જૂના પ્રશ્નોનો અંત આવશે. જયારે જોષીપરા છઘઇ (1/બી) ની મંજૂર ડિઝાઇન ઉપરાંત, બસ સ્ટેન્ડ ફાટક અને રેલવે સ્ટેશન તરફ આવતા બ્રિજને લંબાવવા માટેની ફિઝિબિલિટી તપાસવાની દરખાસ્ત મંજૂર કરાઈ. મનપાની કામગીરીને વેગ આપવા માટે સરકારી એજન્સી જીલ મારફતે નવા કોમ્પ્યુટર સેટ, પ્રિન્ટર અને સ્કેનરની ખરીદી કરવામાં આવશે. મનપાના કાયમી કર્મચારીઓ માટે ગ્રેચ્યુઈટીની મર્યાદા સરકારના નિયમ મુજબ વધારીને રૂ. 25 લાખ કરવામાં આવી છે. શહેરમાં કચરો એકત્રિત કરવાની ડોર-ટુ-ડોર કામગીરી માટે ટેન્ડર પ્રક્રિયા પૂર્ણ કરી નીચા ભાવ ભરનાર એજન્સીને કામ સોંપવાની મંજૂરી અપાઈ. આ ઉપરાંત, સ્ટેશનરી, છાપકામ, સફાઈના સાધનો અને સ્મશાનગૃહ માટે જરૂરી સામગ્રીના વાર્ષિક કોન્ટ્રાક્ટના ટેન્ડરોને પણ મંજૂરી આપવામાં આવી છે.
