આગામી ઈન્ડિયા – કેરીકોમ કોન્ફરન્સ દરમિયાન વડાપ્રધાન મોદીને આ સન્માનથી નવાજવામાં આવશે
ખાસ-ખબર ન્યૂઝ નવી દિલ્હી, તા.15
- Advertisement -
ડોમિનિકા સરકારે ભારતનાં વડાપ્રધાન નરેન્દ્ર મોદીને તેનાં સર્વોચ્ચ નાગરિક સન્માનથી સન્માનિત કરવાનો નિર્ણય લીધો છે. ડોમિનિકાની સરકારે એક અખબારી યાદી બહાર પાડીને જણાવ્યું હતું કે ગયાનામાં યોજાનારી આગામી ભારત-કેરીકોમ કોન્ફરન્સ દરમિયાન વડાપ્રધાન મોદીને આ સન્માનથી સન્માનિત કરવામાં આવશે. ડોમિનિકા સરકારનાં નિવેદનમાં કહેવામાં આવ્યું છે કે ડોમિનિકાના રાષ્ટ્રપતિ સિલ્વેની બર્ટન વડાપ્રધાન મોદીને આ સન્માનથી સન્માનિત કરશે. ફેબ્રુઆરી 2021 માં, વડા પ્રધાન મોદીએ ડોમિનિકાને કોરોના રસી એસ્ટ્રાઝેનેકાના 70 હજાર ડોઝ સપ્લાય કરીને એક મૂલ્યવાન ભેટ આપી હતી.
વડા પ્રધાન મોદીની આ ઉદારતાને ઓળખીને, ડોમિનિકાની સરકારે તેમને તેનાં સર્વોચ્ચ નાગરિક સન્માનથી સન્માનિત કરવાનો નિર્ણય લીધો છે. તેમજ પીએમ મોદીના નેતૃત્વમાં ભારતે ડોમિનિકાને સ્વાસ્થ્ય, શિક્ષણ અને આઈટી ક્ષેત્રે પણ ઘણી મદદ કરી છે. જળવાયુ પરિવર્તન સામે લડવામાં ભારત ડોમિનિકાને પણ મદદ કરી રહ્યું છે. ડોમિનિકાના વડા પ્રધાન રૂઝવેલ્ટ સ્કર્મિટે વડા પ્રધાન મોદીને તેમનાં દેશનાં સાચા મિત્ર ગણાવ્યાં, જેમણે વૈશ્વિક સ્વાસ્થ્ય સંકટ દરમિયાન ડોમિનિકાના લોકોને મદદ કરી હતી. ઇન્ડિયા કેરીકોમ સમિટ 19 નવેમ્બરથી 21 નવેમ્બર 2024 દરમિયાન જ્યોર્જટાઉન, ગયાનામાં યોજાશે. ઘણાં દેશોએ વડાપ્રધાન નરેન્દ્ર મોદીને તેમનાં સર્વોચ્ચ નાગરિક સન્માનથી સન્માનિત કર્યા છે. ગયાં જુલાઈમાં જ રશિયાનાં રાષ્ટ્રપતિ વ્લાદિમીર પુતિને વડાપ્રધાન મોદીને તેમનાં દેશનાં સર્વોચ્ચ નાગરિક સન્માન ’ઓર્ડર ઓફ સેન્ટ એન્ડ્ર્યુ ધ એપોસ્ટલ’થી સન્માનિત કર્યા હતાં. તે પહેલાં પીએમ મોદીને ભૂટાનના સર્વોચ્ચ નાગરિક સન્માન ઓર્ડર ઓફ ડ્રુક ગ્યાલ્પોથી પણ નવાજવામાં આવ્યાં હતાં.
