મેંદરડાનાં ગુંદાળાનો ખેડૂત પુત્ર પાઈલટ બન્યો

બસ સ્ટેશનમાં કોમર્શિયલ પાઈલટ માટે સહાયની જાહેરાત વાંચી અને સ્વપ્ન પૂર્ણ થયું

1 વર્ષમાં 200 કલાક ફ્લાઇંગ કરવાનું હોય છે: અભ્યાસ માટે સરકારે લોન આપી હતી

ખાસ-ખબર સંવાદદાતા

મેંદરડા તાલુકાના ગુંદાળા ગામના ખેડૂત પુત્ર હર્ષ વેગડે રાજ્ય સરકારની સહાયથી પાઈલટ બનવાનું સપનું પુરૂ કર્યું છે. પાઈલટ બની આકાશની ઊંચી ઉડાનના સપના પુરા કરવા માટે સરકારે કોમર્શીયલ પાઈલટ તાલીમ યોજના અમલમાં મુકી છે.હર્ષના પિતા ગુંદાળામાં 10 એકર જમીન ધરાવે છે. તેઓ કહે છે, આર્થિક સંકડામણના કારણે મે પાઈલટ બનવાનું સ્વપ્ન માંડી વાળ્યું હતું. અને એન્જીનીયરનો અભ્યાસ કરવાનુ નક્કી કરેલ. પરંતુ સરકારની આ યોજના થકી હું પાઈલટ બની મારૂ અને પરિવારનું સ્વપ્ન સાકાર કર્યું છે. મેંદરડા તાલુકાના ગુંદાળાના વતની હર્ષ વેગડ ધો.10માં શ્રેષ્ઠ પરિણામ અને ધો.12 સાયન્સમાં 82 ટકા સાથે ઉર્તીણ થયો હતોે. તેમના પિતા જગદીશભાઇ વેગડ ખેતી કરે છે. માતા રસીલાબેન ગૃહિણી છે. જ્યારે મોટા ભાઇ ફાયર સેફ્ટી ઓફિસર છે.

સામાન્ય કે મધ્યમ પરિવારના બાળકો માટે આજના સમયમાં શિક્ષણ મેળવવું સરળ રહયુ નથી. ત્યારે ઉચ્ચશિક્ષણ, ટેક્નીકલ શિક્ષણ આપવું એ અશક્ય થઇ જતું હોય છે. આર્થિક પરીબળના કારણે કોઇ તેજસ્વી બાળક ઉચ્ચ શિક્ષણથી વંચિત ન રહે એ માટે સરકાર દ્વારા વિવિધ કલ્યાણકારી યોજનાઓ કાર્યરત કરવામાં આવી છે. અને સરકારના આર્થિક સહયોગથી સામાન્ય કે મધ્યમ પરિવારનુ એક પણ બાળક શિક્ષણથી વંચિતના રહે તેની પુરી વ્યવસ્થા કરવામાં આવી છે.કોમર્શીયલ પાઈલટ યોજના થકી પાઈલટ બનવાનું સ્વપ્ન પૂર્ણ કરનાર હર્ષ કહે છે, પાઈલટની ટ્રેનીંગ ખુબ જ ખર્ચાળ છે. હાલ મારૂ લાઇસન્સ આવી ગયું છે. હજુ આગળ ઇન્ટરનેશનલ તાલીમ મારે લેવી છે. પાઈલટ બનવા માટે રીડીંગ, ગ્રાઉન્ડની તાલીમ ઘર બેઠા થઇ જાય છે. પરંતુ ફ્લાઇંગ ટ્રેનીંગ માટે વધુ ખર્ચ થાય છે. 1 વર્ષમાં 200 કલાક ફ્લાઇંગ કરવાનું હોય છે. મધ્યમ વર્ગના વિદ્યાર્થી માટે આર્થિક સહાય વગર આ પ્રકારની તાલીમ લેવી શકય ન બની શકે. બીજો કોર્ષ કે અભ્યાસ પસંદ કરવો પડતો હોય છે.

જાહેર સ્થળો ઉપરની સરકારની જાહેરાતે યુવાનનું સપનું સાકાર કર્યું

નાનપણથી જ મને પાઈલોટ બનવાનું સ્વપ્ન હતું. પરંતુ મારા પિતાની આર્થિક પરિસ્થિતી મારા અભ્યાસને પૂરી કરી શકાય તેવી ન હતી, તેથી મેં આ અભ્યાસ બંધ રાખીને એન્જિનિયર બનવાનું નક્કી કરેલ. આ દરમિયાન મને એસ.ટી.બસ સ્ટેન્ડમાં ગુજરાત સરકાર કોમર્શીયલ પાઈલટ બનવા માટે રૂપિયા 25 લાખ સુધીની સહાય કરે છે તે જાહેરાતનું બેનર વાચેલ, તેથી મે નાયબ નિયામક વિકસતી જાતિ જૂનાગઢશ્રી એ. કે. પરમાર તથા એચ. જી. વસોયાનો સંપર્ક કર્યો હતો. તેઓના પૂર્ણ સહયોગ અને માર્ગદર્શનથી ટૂંકા સમયગાળામાં લોન મળી, ત્યાર પછીના એક વર્ષમાં મેં સફળતા પૂર્વક પાઈલટની તાલીમ પૂર્ણ કરી અને મારૂ પાઈલટ બનવાનું સપનું સાકાર કર્યું.